Hinir árlegu Hraunvallaleikar voru í Hraunvallaskóla í vikunni en þá var hefðbundið skólastarf brotið upp í þrjá daga.
Hugmyndin með leikunum er að búa til skemmtilegan viðburð þar sem nemendur og starfsfólk eiga góða daga við leik og skemmtun.
Tekist er á við fjölbreytt verkefni, þrautir og leiki þar sem allir fá að spreyta sig og stórir og smáir hjálpast að. Um 60 stöðvar eru víðs vegar um skólann og fara nemendur í aldursblönduðum hópum á milli stöðvanna. Markmiðið með því er að tengja saman nemendur á mismunandi aldri, efla samskipti og góðan skólaanda.
Fjarðarfréttir litu við í skólanum á lokadegi leikanna og kíkti við á nokkrum stöðvum. Alls staðar ríkti gleði og áhuginn skein úr augum krakkanna.
