Fatlað fólk á rétt á húsnæði í samræmi við þarfir þess og óskir. Á undanförnum árum hefur húsnæðisuppbygging í Hafnarfirði verið hæg. Það endurspeglast í löngum biðlistum eftir félagslegum íbúðum og fatlað fólk hefur fundið fyrir því. Í svari við fyrirspurn Samfylkingarinnar um stöðu húsnæðismála fatlaðs fólks í ágúst sl. kom fram að 56 einstaklingar væru á biðlista. Þar af voru 28 í brýnni þörf. Einnig kom fram að meðalbiðtími væri 6 ár. Á bak við þennan hóp eru fjölskyldur og aðstandendur sem hafa beðið of lengi í óvissu um úrræði fyrir sína nánustu.
Á fundi bæjarstjórnar í byrjun september var samþykkt tillaga Samfylkingarinnar um að fjölskylduráði yrði falið að leggja til leiðir til að vinna bug á vandanum. Í kjölfarið hefur ágæt vinna farið fram í fjölskylduráði. Samningar voru gerðir um uppbyggingu búsetukjarna á Arnarhrauni og uppbygging íbúðakjarna við Öldugötu boðin út. Fyrir áramót var svo samþykktur samningur við félagið Vinabæ um uppbyggingu og rekstur íbúðakjarna á Völlunum. Þar er um að ræða samning við félag sem foreldrar stofnuðu um byggingu og rekstur íbúðakjarna. Þessum áfanga – og öðrum – ber að fagna þótt ferlið hafi tekið of langan tíma hjá bæjaryfirvöldum.
Næstu skref – samráð við notendur
Mikilvægt er að láta ekki staðar numið nú. Næsta skref ætti að fela í sér kortlagningu á núverandi stöðu og mat á því hvaða aðgerða er þörf. Í slíkri vinnu er ný nálgun mikilvæg og í skipulags – og byggingarráði bókaði fulltrúi Samfylkingarinnar um mikilvægi þess að ákveðið hlutfall húsnæðis í nýjum hverfum sé hannað með hliðsjón af þörfum fatlaðs fólks og hjólastólaaðgengi. Samráð við notendur er mikilvæg forsenda þess að vel takist til enda er það eitt af markmiðum nýsamþykktrar húsnæðisáætlunar Hafnarfjarðar 2018-2026 að farið verði í heildstæða stefnumótun í samráði við notendur um framtíðarfyrirkomulag búsetumála fatlaðs fólks. Sú vinna þarf að fara sem fyrst af stað.
Stefna bæjarfélagsins á að stuðla að sjálfstæðri búsetu með fjölbreyttri þjónustu enda er það mikilvægur liður í því að tryggja fötluðu fólki jafnrétti og sambærileg lífskjör á við aðra.
Árni Rúnar Þorvaldsson
fulltrúi Samfylkingarinnar í fjölskylduráði
Greinin birtist í Fjarðarfréttum, bæjarblaði Hafnfirðinga 24. janúar 2019
