Hann fæddist í febrúar 1958 og ólst upp á Hringbraut 34 með fjölskyldu sinni, foreldrum og þremur systkinum, en fjölskyldan flutti síðar yfir garðvegginn í hús á Holtsgötu 12.
Hann var yngstur systkina en eldri systkini hans voru fædd á Bíldudal. Foreldrar hans voru Vestfirðingarnir Erla Hannesdóttir Thoroddsen, húsfrú með meiru og Stefán Ólafsson Thoroddsen sem var lengi útibússtjóri í Búnaðarbankanum í Reykjavík.
Þetta er að sjálfsögðu Gaflarinn og gítarleikarinn Björn Thoroddsen sem þrátt fyrir að hafa flutt fjórtán ára með fjölskyldu sinni til Reykjavíkur, hefur alltaf talið sig Gaflara.
„Tíminn í Hafnarfirði mótaði mig algjörlega,“ segir Björn og minnist dreyminn á svip opna svæðisins á milli Holtsgötu og Hverfisgötu sem hann segist hafa upplifað næstum óbreytt þegar hann fór þar um daginn. „Ég ek alltaf í gegnum Hafnarfjörð þegar ég kem úr Keflavík og tek stundum krókinn eftir Hringbrautinni,“ segir Björn sem greinilega á margar góðar minningar úr Hafnarfirði.
Ótrúlegur tónlistarferill
Björn var 11 ára þegar hann fór að læra á gítar. Aðspurður um tónlist á heimilinu segir Björn að faðir sinn hafi leikið á harmónikku en t.d. hafi ekki verið til plötuspilari á heimilinu. „En það var djúkbox í Dórasjoppu,“ segir Björn og það fer nokkur tími í að finna nákvæmlega út í hvaða húsi hún var. Niðurstaðan var að hún hafi verið í gamla Birninum, Vesturgötu 2, sem nú er búið að rífa. Þar var Kaupfélagið með veiðarfæra- og byggingavöruverslun og þar minnist Björn sjoppunnar og djúkboxins.
„Þar heyrði ég t.d. Hey Joe með Jimi Hendrix sem ég gleypti í mig og hljóp heim til að reyna að spila það,“ segir Björn og segir að það hafi ekki gengið sérstaklega vel. Hann segist þó hafa haft gott eyra en það var öllu flóknara að finna hljóma og annað hjálplegt sem nú er aðgengilegt öllum á vefnum.
Fyrsti gítarinn
Hann fékk sinn fyrsta gítar í fermingargjöf, tékkneskan Lignastone gítar úr Hljóðfærahúsi Sigríðar Helgadóttir. Hann fór fljótt að spila í hljómsveitum með öðrum strákum og fyrsta sviðsframkoman var í pásu á dansæfingu í Flensborg þegar Björn var 13 ára. 14 ára lék hann svo fyrst á tónleikum í Bæjarbíói en þar verður Björn einmitt áberandi á næstunni.
Áhuginn jókst og um 17 ára aldur var hann farinn að spila með hljómsveitum í Reykjavík. Hann segist hafa verið fljótur að „pikka“ upp lög en áttaði sig á því að nauðsynlegt var að kunna á nótur. Hann hóf þá nám í klassískum gítarleik í Tónskóla Sigursveins, en ekki var boðið upp á annað gítarnám á Íslandi á þessum tíma.
Nám í Los Angeles
Eftir hvatningu kennara síns hélt Björn árið 1980 til Los Angeles. „Þar fór ég í flottasta gítarskóla sem er til enn þar var kennt á rafgítar, djass, blues, popp og í raun allt nema klassískan gítarleik. Mér gekk mjög vel þar, a.m.k. fékk ég viðurkenningu sem einn af 10 hæfileikaríkustu gítarleikurunum þar.
Þetta var greinilega mikill og góður skóli fyrir Björn og þar kynntist hann fjölda hæfileikaríkra gítarleikara. Og þarna lærði Björn að koma fram, að það væri ekki nóg að vera góður gítarleikari. Þetta var erfitt fyrir feiminn Íslendinginn en átti eftir að koma sér vel.
„Það fyrsta sem ég gerði þegar ég kom heim var að hringja í Björgvin Halldórsson,“ segir Björn og glottir. „Björn hver?,“ svaraði Björgvin nokkuð kuldalega, þegar hann kynnti sig. „Það var skemmtilegt samtal,“ segir Björn og brosir en bætir því við að Björgvin hafi tekið sér afskaplega vel. Björgvin bauð honum með sér í Hljómsveit Björgvins Halldórssonar og Björn tók með sér í hljómsveitina, tvo sænska skólabræður frá Los Angeles. „Þetta var ógeðslega góð hljómsveit,“ segir Björn en fyrst var farin hefðbundinn túr um Ísland en svo tók við fræg 5 vikna Rússlandsferð hljómsveitarinnar. „Þarna spiluðum við lögin hans Bjögga, Totolög og tvö af mínum lögum,“ segir Björn.
Síðan tóku við nokkur ár á Broadway og segir Björn að þetta hafi verið blómatími með góðum launum. En þetta var í síðasta skiptið sem Björn lék í dans/ball hljómsveit.
Síðan hefur Björn leikið víða um heim með hæfileikaríkustu gítarleikurum heims. Hann fór fljótt að semja og útsetja og hefur ekki tölu á hljómplötum sínum sem gefnar hafa verið út um víðan heim.
Feimnin og uppistandið
Hann kom einn fram í fyrsta skipti í Kanada og segir það hafa verið gríðarlega erfitt en sér hafi verið tekið afskaplega vel og oftar og oftar hafa hann komið fram einn með gítarinn og verið eins og uppstandari. „En þegar ég sit með gítarinn og byrja að tala, þá er vart hægt að stoppa mig,“ segir Björn sem segist hins vegar varla geta hugsað sér að standa upp og halda stutta tölu.
Hér er ekki pláss til að rekja feril Björns enda mun sú saga fylla heila bók sem nú er í vinnslu.
Guitarama í Bæjarbíói
En næst á döfinni er Guitarama 2019 sem Björn heldur í tólfta sinn, 2. nóvember nk., en Björn hefur flutt tónleikana í Bæjarbíó.
Upphaflega var Guitarama nær eingöngu með gítarleikurum en nú er gítarinn í aðalhlutverki en hljómsveitin er breiðari og þarna verður popp-, rokk- og djassblönduð tónlist og söngur.
Nú er hljómsveitin ný, ungir krakkar í bland við þekkta tónlistarmenn. Með Birni verður m.a. Unnur Birna Bassadóttir, fiðluleikari og söngvari úr Hveragerði, Skúli Skaftason trommuleikari frá Selfossi og Sigurgeir Skafti Flosason, bassaleikari frá Hveragerði.
Gestir verða Hafnfirðingarnir Andrés Þór Gunnlaugsson, Gunnar Þór Jónsson, Krummi Björgvinsson, Pétur Valgarð Pétursson og Stefán Hjörleifsson.
Björn verður að sjálfsögðu í aðalhlutverki og mun rifja upp ýmislegt skemmtilegt frá ferli sínum og án efa verður þetta hin besta skemmtun og upplifun enda hæfileikaríkt fólk á sviði.
Kaupa má miða á tónleikana hér.
Tónleikar með Bo
Aðspurður um hvað sé framundan segir Björn mjög mikið liggja fyrir. Hann sé m.a. að fara að vinna með Robben Ford í nýrri hljómsveit Björns Thoroddsen en þeir hafa spilað mikið saman og er hann stórt nafn í amerískum gítarheimi. Með þeim verður m.a. Unnur Birna Bassadóttir, fiðluleikari og söngvari, sem Björn segir gríðarlega hæfileikaríkra.
Þá eru í pípunum tónleikar þar sem Björn og Björgvin Halldórsson leiða saman hesta sína en það verða örugglega mjög áhugaverðir tónleikar.
