Nýtt leiðakerfi Strætó í undirbúningi

Faghópur um leiðakerfismál var skipaður af stjórn Strætó í febrúar 2019 og er áætlað að faghópurinn skili hug­myndum að nýju leiðaneti til stjórnar Strætó í nóvember á þessu ári.

Í faghópnum eiga sæti: Fulltrúar úr leiðakerfi Strætó, fulltrúar sveitar­félaganna á höfuðborgarsvæðinu, full­trúi Vegagerðarinnar, fulltrúi Samtaka um bíllausan lífsstíl og fulltrúi Sam­göngu- og sveitastjórnarráðuneytisins.

Markmið verkefnisins er að laga Strætó að breyttu skipulagi og innleiða nýjar áherslur þar sem örari tíðni og styttri ferðatími verður í forgrunni.

Leitað til almennings

Nú er leitað til almennings um álit á ábendingar en á næsta ári verður nýtt leiðakerfi prófað í umferðarlíkani og eftir það verður leitað til almennings á ný.

Strætó leggur mikla áherslu á þátt­töku almennings í mótun nýs leiðanets. Eru íbúar höfuðborgar­svæð­isins hvattir til að skoða fyrstu hugmyndir að nýju leiðaneti og koma fram með hugmyndir og ábendingar um legu leiða og stað­setningu stoppistöðva.

Hefur verið sett upp sérstök síða á straeto.is/nytt-leidanet þar sem nálgast má nánari upplýsingar og leiðbeiningar.

Stofnleiðir og almennar leiðir

Lagt er til að skipta leiðanetinu í tvo flokka: stofnleiðir og almennar leiðir og taka fyrstu hugmyndir mið af því.

Stofnleiðanetið er skipulagt sem burð­ar­­ásinn í nýju leiðaneti og tilgangur þess verður að flytja mikinn fjölda far­þega á sem stystum tíma.  Áætlað er að vagnar á stofnleiðum aki á 7-10 mín­útna fresti á annatímum og 15-20 mín­útna fresti utan annatíma.

Áætlað er að Borgarlínan muni leysa hluta stofnleiðanets Strætó af hólmi eftir því sem sérrými Borgarlínu bygg­ist upp.

Við hönnun almenna leiðanetsins er hugsunin sú að tengja hverfi höfuð­borgarsvæðisins við stofnleiðanet Strætó og Borgarlínu. Áætlað er að almenn­ar leiðir aki á 15 mínútna tíðni á anna­tíma og á 20-30 mínútna tíðni utan annatíma.

Íbúaþéttleiki ræður legu leiða

Nýja leiðanetið er m.a. skipulagt út frá íbúaþéttleika.

Samkvæmt fyrstu hugmyndum um nýtt leiðanet munu meira en tvöfalt fleiri íbúar höfuðborgarsvæðisins búa í innan við 400 m radíus frá stoppistöð með a.m.k. 10 mínútna tíðni, eða 64% íbúa í stað 26% í núverandi leiðaneti.

Ef skipulagsáætlanir sveitarfélaga ganga eftir þá mun stór hluti upp­byggingar á næstu árum eiga sér stað í nágrenni við þær stofnleiðir sem teikn­aðar hafa verið upp í nýju leiðaneti. Það má því gera ráð fyrir að þetta hlutfall muni verða enn hærra í framtíðinni.

Þekjandi kerfi

Núverandi leiðanet Strætó er að miklu leyti skipulagt sem „þekjandi kerfi“.  Algengt er að vagnar leggi lykkju á leið sína til þess að ná viðkomu í sem flestum hverfum höfuð­borgar­svæð­isins. Með slíku fyrirkomulagi dreif­ist þjónustan yfir stærra landsvæði, ferðatími eykst, tíðni minnkar og farþegar eru ekki eins margir. Í slíku kerfi er þó yfirleitt stutt í næstu biðstöð.

Þátttökukerfi

Í hugmyndum um nýtt leiðanet og Borgarlínu verður þyngri áhersla lögð á „þátttökukerfi“. Í slíku neti er mest tíðni þar sem þéttleiki íbúa og vinnustaða er mestur. Leiðirnar eru beinni, með örari tíðni, styttri ferðatíma og fleiri farþega.  Á móti, gætu farþegar þurft að fara lengri vegalengdir á næstu biðstöð.

Komið á í áföngum

Nýtt leiðanet verður innleitt í skrefum eftir því sem hægt er en stærstu breytingarnar eru áætlaðar um 2023 þegar áætlað er að fyrsta áfanga Borgarlínu verði lokið.

Stærstu breytingarnar munu felast í nýju skipulagi við Hlemm þar sem einungis verður gegnumakstur almenn­ingssamgangna, nýrri endastöð á BSÍ reit, brú yfir Fossvog og nýrri skiptistöð í Vogabyggð. Borgarlínan mun taka við hluta stofnleiða í áföngum eftir því sem sérrými Borgarlínu byggist upp.

Opið hús 28. október

Strætó mun halda opin hús á nokkrum stöðum á höfuðborgarsvæðinu. Þar geta áhugasamir kynnt sér leiðanetið og komið sínum ábendingum á framfæri við starfsfólk Strætó og verkefnastofu Borgarlínu.

Opið hús verður í Firði mánudaginn 28. október kl. 15-18.

Ummæli

Ummæli