Það er mikið fagnaðarefni að stefnubreyting hefur orðið varðandi vinnu við deiliskipulag miðbæjar Hafnarfjarðar þar sem íbúasamráð verður haft að leiðarljósi. Þetta er stefnubreyting hjá núverandi meirihluta Sjálfstæðs- og Framsóknarflokks sem hafði lítinn áhuga á samtali við íbúa og hagsmunaaðila og raunar hafnaði tillögum um það og felldi líka úr gildi rammaskipulag sem byggði á mikilli samvinnu við íbúa.
Enginn vill kannast við tillögurnar
Fyrr á þessu ári var skipaður starfshópur um vinnu miðbæjarins með afar óljóst hlutverk. Hann skilaði nú í haust drögum að skýrslu þar sem fram kom í fylgiskjali mikil aukning byggingamagns með háum húsum og m.a. byggingum á uppfyllingu við ströndina sem gjörbreytti ásýnd bæjarins. Allt gert án samráðs eða samtals við íbúa, enda mættu þessar hugmyndir harðri andstöðu íbúanna. Þá vildi enginn kannast lengur við tillögur starfshópsins.
Samfylkingin í Hafnarfirði hefur talað fyrir íbúasamráði og lagði fram bókun um það í skipulags- og byggingarráði nú í september. Í bókuninni er lagt til að ferlið við endurskoðun miðbæjarskipulagsins verði hafið að nýju og áhersla lögð á virkt íbúasamráð frá upphafi.
Sýndarsamráð?
Þessi bókun er nú grundvöllurinn að nýju upphafi sem hófst í síðustu viku á vinnufundi með íbúum. Það var afar ánægjulegt að taka þátt í samtalinu og heyra hugmyndir íbúanna um hvernig við getum byggt upp hjarta Hafnarfjarðar með fjölbreyttri íbúabyggð og öflugri þjónustu og verslun. Spennandi verður að sjá nýjar niðurstöður starfshópsins sem taka mið af vilja íbúanna og hugmyndum þeirra. Nema meirihlutinn ætli sér einungis í samráð til að sýnast og láti hugmyndir íbúanna sig engu skipta. Það væri í takt við fyrri vinnubrögð, en fólkið í bænum lætur það ekki yfir sig ganga eins og reynslan staðfestir.
Stefán Már Gunnlaugsson,
fulltrúi Samfylkingarinnar í skipulags- og byggingarráði.
