Leiðrétting vegna misskilnings í aðsendri grein frá Óskari Steini Ómarsyni í síðasta blaði Fjarðarfrétta.
Varðandi fyrirhugaða hækkun á leigu í félagslega húsnæðiskerfinu í Hafnarfirði liggur fyrir tillaga um 21% hækkun á leiguverði þann 1. janúar 2020. Leiguverð er nú tæplega 1.300 kr. og verður eftir hækkun tæplega 1.600 krónur á fermetra.
Þessi hækkun er tilkomin til þess að mæta kostnaði við viðhald og rekstur þessa B-hluta fyrirtækis í eigu Hafnfirðinga þannig að ekki komi til greiðslu úr A-hluta sbr. bls. 41 í greinargerð með fjárhagsáætlun 2020. Á undanförnum árum hefur íbúðum verið fjölgað verulega og reglur verið yfirfarnar til þess að tryggja sem kostur er að þetta búsetuúrræði nýtist þar sem þörfin er mest. Í október samþykkti fjölskylduráð þá breytingu að leigjendur í félagslegum íbúðum eiga nú rétt á sérstökum húsnæðisstuðningi frá Hafnarfjarðarbæ en sá stuðningur er til viðbótar almennum húsnæðisstuðningi sem ríkið veitir. Allir sem fá almennar húsnæðisbætur frá ríkinu geta þar með sótt um að fá sérstakar húsnæðisbætur á heimasíðu Hafnarfjarðarbæjar og þær eru 90% af þeirri fjárhæð sem ríkið greiðir.
Þessi breyting á reglum vegur uppá móti fyrirhugaðri hækkun á leiguverði og hefur misjöfn áhrif til lækkunar en fyrir tekjulægsta hópinn þá mun endanlegur húsnæðiskostnaður minnka.
Áfram verður Hafnarfjörður með lægsta leiguverð miðað við önnur óhagnaðardrifin leigufélög sem rekin eru á sömu forsendum.
Varðandi aðrar breytingar á gjaldskrá sem Ómar nefnir í grein sinni þá er það rétt að ferðir í akstursþjónustu eldri borgara munu hækka og verða sama gjald og almennt strætófargjald eða tæplega 500 krónur og tímagjald í heimaþjónustu hækkar um 24% og verður eftir hækkun 757 krónur á klukkustund. Þrátt fyrir þessa hækkun er Hafnarfjörður með mun minni kostnaðar þátttöku vegna þjónustunnar en nágrannasveitarfélögin.
Helga Ingólfsdóttir, bæjarfulltrúi.
