Óvenju mikið virðist hafa verið um að ekkert ljós sé á ljósastaurum víða um Hafnarfjörð. Á sumum götum er nánast myrkur þar sem nokkrir ljósastaurar í röð eru ljóslausir og hafa verið í marga daga.
Enn víðar eru stakir staurar ljóslausir og svoleiðis geta þeir verið í margar vikur og íbúar hafa ekki á hreinu hver á að taka við ábendingu.
Íbúar hafa kvartað yfir ljósleysinu á samfélagsmiðlum og í morgun voru starfsmenn HS-veitna að bregðast við vandanum í Setberginu en þar virðist vandinn við marga ljóslausa staura í röð hafa verið leystur í spennistöð þó einstakir ljóslausir staurar séu enn ljóslausir.
Í samtali við Fjarðarfréttir segir Sigurður Haraldsson, sviðsstjóri umhverfis- og framkvæmdasviðs Hafnarfjarðarbæjar, að þar á bæ séu menn meðvitaðir um vandann. HS Veitur sér um rekstur á götulýsingu fyrir Hafnarfjarðarbæ og að sögn Sigurðar var búið að senda þjónustubeiðni á HS Veitur en þar hafi seint verið brugðist við.
Segist Sigurður ósáttur með þjónustuna og hefur óskað eftir fundi með fulltrúum HS Veitna í þessari viku þar sem farið verður yfir málin. Segir hann ástandið hafa verið mjög slæmt undanfarið og hafi farið versnandi.
Bæjarbúar geta tilkynnt um ljóslausa staura til Hafnarfjarðarbæjar eða beint til HS veitna.
