Eftir alvarlegar athugasemdir Skipulagsstofnunar við nýsamþykkt deiliskipulag fyrir Hraun vestur – Gjótur, hefur skipulags- og byggingarráð lagt til við bæjarstjórn að deiliskipulagið verði afturkallað og að gerð verði breyting á aðalskipulagi.
Meðal athugasemda Skipulagsstofnunar kemur fram að deiliskipulagið sé ekki í samræmi við aðalskipulag sem í gildi er.
Ólafur Ingi Tómasson, bæjarfulltrúi og formaður skipulags- og byggingarráðs, upplýsti á bæjarstjórnarfundi sem nú stendur yfir að boðað verði til kynningarfundar um skipulagið og það fari aftur í lögformlegt ferli.
Þetta er kúvending hjá formanninum sem hafnaði beiðni fulltrúa minnihluta í bæjarstjórn um kynningarfund um deiliskipulagið sem tók miklum breytingum undir lokin.
Skipulagsstofnun gerði m.a. athugasemd við að kynningu væri ábótavant og að ekki hafi verið haldinn kynningarfundur. Tillaga þess efnis var t.d. lögð fram í skipulags- og byggingarráði en var hafnað af meirihluta Sjálfstæðis- og Framsóknarflokks.
