Hildur Guðnadóttir fékk fyrsta íslenska Óskarinn

Tónskáldið og sellóleikarinn hafnfirski, Hildur Guðnadóttir, varð í nótt fyrsti Íslendingurinn til að hljóta hin eftirsóttu Óskarsverðlaun.

Hlaut hún verðlaunin fyrir tónlistina við kvikmyndina Joker og varð hún fjórða konan frá upphafi til að hljóta verðlaunin í flokki frumsaminnar kvikmyndatónlistar.

Hildur var hrærð yfir móttökunum sem hún fékk en þetta var fyrsta tilnefning sem Hildur hefur fengið til Óskarsverðlaunanna. Hún minntist á fjölskyldu sína, eiginmann sinn og besta vin, Sam Slater, móður sína og son sem öll voru með henni við afhendinguna í nótt.

„Við stúlkurnar, konurnar, mæðurnar, dæturnar sem heyra tónlistina ólga í sér, vil ég segja: Látið til ykkar heyra. Við þurfum að heyra raddir ykkar,“ sagði Hildur í lok hjartnæmrar þakkarræðu sinnar í nótt og uppskar mikil fagnaðarlæti.

Eru þessi verðlaun enn ein rósin í hnappagatið fyrir Hildi sem þegar hafði hlotið Gold­en Globe-verðlaunin og BAFTA-verðlaunin fyr­ir tónlistina í Joker og Grammy- og Emmy-verðlaunin fyr­ir tónlist sína í þátt­un­um Cherno­byl.

Hér má sjá Hildi svara spurningum blaðamanna baksviðs eftir afhendinguna:

Ummæli

Ummæli