Listdansskóli Hafnarfjarðar komst áfram með fjögur af sex atriðum sínum í undankeppni „Dance World Cup“ danskeppninnar sem haldin var í Borgarleikhúsinu sl. sunnudag.
Þau atriði sem komust áfram fara til Rómar í sumar til að keppa með landsliði dansara. Þar keppa dansskólar frá 32 löndum með 4 til 25 ára dansara. Eru dansskólarnir hvattir til að mæta með hópatriði svo sem flestir geti tekið þátt. Fyrsta Dance World Cup keppnin var haldin í Grikklandi árið 2001.
![](https://www.fjardarfrettir.is/wp-content/uploads/2020/02/DanceWorldCup.jpg)
Af þeim sem kepptu sl. sunnudag komust 59 sólódansarar áfram, 18 pör og þriggja manna hópar, 14 litlir danshópar og 10 stórir danshópar. Samtals komust 10 dansskólar áfram í keppnina í Róm.
![](https://www.fjardarfrettir.is/wp-content/uploads/2020/02/æfing-1024x599.jpg)
Nú tekur við undirbúningstímabil og ákvarðanataka hvort farið verður til Rómar því allt kostar þetta peninga og fellur kostnaðurinn á foreldra. Munu dansararnir eflaust leggja hart að sér til að safna fyrir ferðinni.