Heilbrigðisráðherra hefur eins og kunnugt er ákveðið að virkja heimildir sóttvarnalaga sem felur m.a. í sér að skólahald verður takmarkað tímabundið. Nánari útfærslur verða unnar samkvæmt tilmælum stjórnvalda. Sveitarfélögin á höfuðborgarsvæðinu vinna nú að skipulagningu skólastarfs m.v. þessar ákvarðanir.
Mánudagurinn 16.mars verðu starfsdagur í grunn- og leikskólum á höfuðborgarsvæðinu til þess að stjórnendur og starfsmenn grunn- og leikskóla geti skipulagt skólastarfið sem best á þessu tímabili sem takmörkunin nær til. Starfsdagur þýðir að starfsfólk mætir til vinnu en nemendur leikskóla og grunnskóla mæta ekki í skólann þennan mánudag.
Þá eru í undirbúningi sameiginlegar leiðbeiningar sveitarfélaga á höfuðborgarsvæðinu um frístundaheimili, íþróttastarf, íþróttamannvirki, skólahljómsveitir og aðrar tómstundir barna.
Hefðbundin starfsemi Flensborgarskóla og Tækniskólans hættir í hálfan mánuð frá og með mánudegi og reynt verður að sinna kennslu með fjarnámsbúnaði.
Hafnarfjarðarbær birti tilkynningu um þetta á heimasíðu sinni en hefur ekki sent út tilkynningu til fjölmiðla.
