Gengið hefur verið frá nýjum kjarasamningi milli verkalýðsfélaga starfsfólks sem starfar í álverinu í Straumsvík og Rio Tinto á Íslandi. Samningurinn gildir frá 1. júní 2019, til 31. mars 2021, eða alls í 22 mánuði.
Verkfallsaðgerðum, sem hefjast áttu 24. mars nk. hefur því verið frestað.
Samningurinn byggir í öllum meginatriðum á þeim kjarasamningum sem þegar er búið að gera.
„Því til viðbótar náðust inn að hluta leiðréttingar á ýmsu þar sem laun starfsfólks í álverinu hafa dregist aftur úr öðrum samningum frá 2015,“ segir í tilkynningu Hlífar. „Það er ljóst, að órofa samstaða starfsfólks, eins og hún birtist í atkvæðagreiðslu um boðun aðgerða, hefur skilað þessum árangri.“
Samningurinn verður kynntur á næstu dögum í félögunum. Kynningarnar munu taka tillit til ástandsins í samfélaginu vegna COVID-19 faraldursins og fara að einhverju leyti fram í fjarfundaformi og á vefjum félaganna.
Áætlað er að atkvæðagreiðsla um samninginn hefjist kl. 11 nk. þriðjudag og ljúki kl. 11 föstudaginn 27. mars.
