Á tíunda tímanum í kvöld var tilkynnt um eld við Álhellu á Geymslusvæðinu í Kapelluhrauni.
Tveir slökkvibílar fóru af staðinn en fóru fyrst í iðnaðarsvæðið í Hellnahrauni en urðu þar frá að hverfa því þaðan er ekki hægt að komast að Geymslusvæðinu. Ekki er vitað á þessari stundu hvort slökkviliðið hafi fengið rangar upplýsingar eða ruglast á hverfum þar sem göturnar hafa sömu endingu. Á korti ja.is má ætla að tenging sé á milli hverfanna. Þá eru tvær götur sem heita mjög svipað, Álhella og Álfhella. Álfhella nær frá Breiðhellu og inn á svæði Kvartmíluklúbbsins, en Álhella er frá Reykjanesbraut að Geymslusvæðinu.
Sem betur fer var eldur ekki mikill en slökkviliðið þurfti að bíða í smá stund þegar það kom að svæðinu frá Reykjanesbraut því svæðið er með læstu hliði.
Greiðlega gekk að slökkva eldinn sem var í einhverju sem þarna er geymt. Nokkuð var í næsta hús og mikið af farartækjum og gámum.
