Undanfarin ár hefur á hreinsunardögum í Hafnarfirði verið hægt að skilja eftir garðaúrgang við lóðarmörk sem Hafnarfjarðarbær sá um að sækja og farga.
Gámar fyrir garðaúrgang við grunnskólana
Nú verður annar háttur á og settir verða upp gámar fyrir garðaúrgang við alla grunnskóla bæjarins.
Gámarnir verða við skólana frá morgni fimmtudagsins 21. maí til kl. 17, sunnudaginn 24. maí.
Ekki má setja garðaúrganginn í pokum í gáminn heldur skal losa úr pokunum í gáminn.
Minnka má verulega garðaúrgang sem þarf að fara með í burtu með því að hafa safnhaug í garðinum og nýta til moltugerðar.
Íbúar sem nú þegar eru komnir með poka við lóðarmörkin þurfa að fara með pokana í Sorpu en sjá má hvenær opið er á Breiðhellu hér.
Löngu tímabær breyting og/eða auknar kröfur um sóttvarnir
Tilvist þjónustunnar hefur verið til umræðu síðustu misseri en þjónustan hefur kallað á mikinn akstur og vinnu starfsmanna bæjarins. Vonir standa til þess að breytt fyrirkomulag leiði til þess að magn plastpoka og urðun tengd garðhreinsun minnki og að endurnýting og moltugerð aukist.
