Álit Skipulagsstofnunar á valkostagreiningu og mati á umhverfisáhrifum Suðurnesjalínu 2 var tekið til umræðu á fundi skipulags- og byggingarráðs í morgun.
Ráðið tekur greinilega ekki afstöðu til álits Skipulagsstofnunar sem taldi jarðstrengur meðfram Reykjanesbraut væri besti kosturinn en ekki jarðstrengur að hluta innan Hafnarfjarðar og Reykjanesbæjar og lína þar á milli eins og fyrsti kostur Landsnets er.
Þess í stað er birtur eftirfarandi texti í fundargerð sem ætla má að sé bókun fulltrúa meirihluta í ráðinu sem aftur má ætla að sé bókun fulltrúa Sjálfstæðisflokks og Framsóknar þó það komi hvergi fram í fundargerðinni.
Þar kemur m.a. fram að meirihluti skipulags- og byggingarráðs skori á stjórnvöld að tryggja raforkuöryggi með hagsmuni íbúa og fyrirtækja að leiðarljósi. Segja þeir flókið og erfitt regluverk einkenna þennan málaflokk.
„Aðalskipulag Hafnarfjarðar 2013-2025 gerir ráð fyrir að Suðurnesjalína 2 tengist frá Hamranesi að tengivirki í Hrauntungum. Hluti leiðarinnar næst byggð verður lagður í jarðstreng eða alls 2.290 m. Frá Hrauntungum er gert ráð fyrir að Suðurnesjalína 2 fari í loftlínum um þegar raskað hraun að hluta.
Jarðstrengur frá Hrauntungum að sveitarfélaginu Vogum mun valda mikilli röskun á hrauni og fara yfir fornminjar á þeirri leið.
Raforkuöryggi í Hafnarfirði er nokkuð gott óháð Suðurnesjalínu 2 fyrir utan að bilun á Suðurnesjalínu 1 getur mögulega valdið útleysingum á höfuðborgarsvæðinu. Fari svo að MF1 (lína á milli Rauðamels og Fitja) bili getur það valdið yfirlestun með útslætti og rafmagnsleysi m.a. í Hafnarfirði. Með tilkomu Suðurnesjalínu 2 verður raforkuöryggi Hafnfirðinga bætt hvað það varðar. Samkvæmt upplýsingum Landsnets getur orðið kerfishrun á Suðurnesjum við bilun á Suðurnesjalínu 1.
Meirihluti skipulags- og byggingarráðs bendir á að undirbúningur fyrir Suðurnesjalínu 2 hófst árið 2006 og nú 14 árum síðar er staða línunnar á byrjunarreit. Einnig má benda á samkomulag á milli Hafnarfjarðarkaupstaðar og Landsnets um niðurrif Hamraneslínu, nýja Lyklafellslínu og flutnings á Ísallínum fjær byggð. Samkvæmt samkomulaginu væri ný Lyklafellslína komin í notkun, búið væri að fjarlægja Hamraneslínu frá Hamranesi að Sandsskeiði og færa Ísallínur ef ekki hefði komið til kæru á framkvæmdarleyfi frá Hraunavinum og Náttúruverndarsamtök Suðvesturlands.
Benda má á að aðalskipulag allra sveitarfélaga sem Lykklafellslína og Suðurnesjalína 2 liggja um hafa verið samþykkt með þeim línum.
Meirihluti skipulags- og byggingarráðs skorar á stjórnvöld að tryggja raforkuöryggi með hagsmuni íbúa og fyrirtækja að leiðarljósi. Flókið og erfitt regluverk einkennir þennan málaflokk.“
