Íbúi sendi Fjarðarfréttum meðfylgjandi myndir sem sýnir bíl frá Íslenska Gámafélaginu losa úr tanki bílsins við enda botnlangagötu á Álfaskeði, rétt við göngustíg.
Þó ummerki séu ekki mikil á staðnum má þó sjá að þarna hefur verið dælt skítugu vatni frá götusópun en vatnið getur innihaldið hvers kyns óþverra af götunum.
Halldór Ásgrímur Ingólfsson, tæknifræðingur á umhverfis- og skipulagssviði Hafnarfjarðarkaupstaðar segir þessir bílar megi aðeins losa á ákveðnum stöðum og að málið verði skoðað.
Verktakar eru nú við sópun á götum bæjarins fyrir veturinn til m.a. að hreinsa upp lauf og annað sem stíflað gæti niðurföll.
Niðurföll í götum bæjarins eru hins vegar yfirfarin og hreinsuð á þriggja ára fresti svo ef bæjarbúar sjá stífluð niðurföll er rétt að tilkynna það hér.
