Krummi virðist gera sig sífellt heimakomnari í byggð enda baráttan um fæðu hörð. Hrafninn hefur alltaf þótt nokkuð skemmtilegur en þó brögðóttur og oft mjög illskeyttur. Eru bændur lítt hrifnir af krumma í sauðburði þar sem hann hikar stundum ekki við að kroppa í lömbin um leið og þau eru á leið í heiminn. Má segja að hann sé bæði elskaður og hataður.
En í þéttbýli þykir fólki gaman að fylgjast með flugi og skondnu hátterni hans en hann á það til að leika alls kyns listir á flugi.
Hrafninn er staðfugl og verpir aðallega frá miðjum aprílmánuði. Hrafninn verpir í klettum, giljum og hraunum á láglendi, en er sjaldgæfur ofan 400 m hæðarlínu. Hreiðrið sem kallast laupur er úr alls kyns drasli, gripabeinum, sprekum og gaddavír, fóðrað með ull og fjöðrum og er því valinn staður á syllu eða í skúta.
Á húsinu við Staðarhvamm verpir hann einmitt á syllu uppi undir mæni og hefur hann búið sér til mjög stóran laup og situr þar sem fastast. Blasir laupurinn við íbúum í Háahvammi og Stekkjarhvammi.
