Lögreglubifreið með blikkandi ljós stöðvaði umferð að Staðarbergi 2 um tíma í dag en þá hafði álplata úr þakkanti fokið niður og fallið á milli bíla á bílastæðinu, þó án þess að valda neinu tjóni.
Slökkviliðið kom síðar á staðinn með körfubíl og tveir slökkviliðsmenn voru hífðir upp á þak á lægri hluta hússinns þar sem þeir losuðu plötu sem var blaktandi laus og fleiri plötur sem búast mátti við að losnuðu líka.
Ástæða þess að plöturnar losnuðu í nokkrum vindi í dag var greinilega mikill fúi í grind sem er undir þakkantinum. Líklegt er að endurnýja þurfi stóran hluta þakkantsins og mikil mildi að enginn slasaðist þegar platan fauk niður.
Húsnæðið bak við þakkantinn er í eigu Oddfellowreglunnar og sagði fulltrúi hennar í hússtjórn þetta hafi komið á óvart og greinilegt að leggja þurfi í töluvert viðhald. Það fellur þó ekki aðeins á Oddfellowa enda er þak og hjúpfletir húss sameign allra.
