Bikarkeppni Frjálsíþróttasambands Íslands og bikarkeppni 15 ára og yngri var haldin í Kaplakrika um helgina.
Sex karla lið og fimm kvenna lið voru skráð til leiks í fullorðins flokki.
Lið FH sigraði árið 2019 en ekki var keppt í fyrra vegna heimsfaraldurs.
FH-ingar voru ekki á þeim buxunum að sleppa titlinum og sigruðu í ár með 74 stig, sjö stigum fleiri en ÍR sem fékk 67 stig. Sameiginlegt lið Fjölnis og Aftureldingar varð í 3. sæti með 42 stig.
B-lið FH varð í fjórða sæti með 28 stig og UMSS, Ungmennafélag Skagafjarðar varð í fimmta sæti mep 24 stig.
Sigraði bæði í karla- og kvennaflokki
![](https://www.fjardarfrettir.is/wp-content/uploads/2021/08/Bikar-frjalsar-2021-FH-1.jpg)
FH sigraði nokkuð örugglega í kvennaflokki, fékk 35 stig en lið ÍR fékk 29 stig í öðru sæti og sameiginlegt lið Fjölnis og Aftureldingar varð í þriðja sæti með 20 stig.
Sigur FH í karlaflokki var ekki eins öruggur eða aðeins 1 stig. Fékk FH 39 stig, ÍR 38 stig í öðru sæti en UMSS varð í þriðja sæti með 24 stig.
ÍR fékk þó flest gullverðlaun, 9 talsins en FH fékk 7. FH fékk hins vegar flest verðlaun í heildina eða 19 á mót 16 verðlaunum ÍR.
37 ára sigurvegari
![](https://www.fjardarfrettir.is/wp-content/uploads/2021/08/Bikar-frjalsar-2021-FH-2.jpg)
TIl gamans má geta að hinn 37 ára, Kristinn Torfason lætur ekki deigan síga og stóð uppi sem öruggur sigurvegari, stökk 6,77 m. Kristinn er ekki óvanur því og á best 7,77 m.
FH í öðru sæti í bikarkeppni 15 ára og yngri
Semeiginlegt lið Selfoss og HSK sigraði í bikarkeppni 15 ára og yngir með 74 stig en FH varð í öðru sæti með 60 stig. B-lið Selfoss og HSK varð í þriðja sæti með 50 stig.
FH sigraði í kvennakeppninni með 39 stig, fjórum stigum fleiri en HSK/Selfoss.
Karlalið FH varð hins vegar í þriðja sæti í karlakeppninni með 21 stig, á eftir bæði A- og B-liði HSK/Selfoss sem fengu 39 og 25 stig.
Ísold setti mótsmet
Ísold Sævarsdóttir FH setti mótsmet er hún stökk 5,54 í langstökki en hún er fædd 2007.
Þá setti Hjálmar Vilhelm Rúnarsson aldursflokkamet í spjótkasti 13 ára, er hann kastaði 46,02 m.
Ljósmyndir: FRÍ