Kosið verður til Alþingis á morgun, laugardag, en alls eru þingsætin 63. Í suðvesturkjördæmi, sem nær yfir Hafnarfjörð, Garðabæ, Kópavog, Seltjarnarnes, Mosfellsbæ og Kjósarhrepp, eru 13 þingsæti og þar af 2 jöfnunarþingsæti.
Tíu stjórnmálasamtök bjóða fram í kjördæminu, Flokkur fólksins, Framsóknarflokkurinn, Frjálslyndi lýðræðisflokkurinn, Miðflokkurinn, Píratar, Samfykingin, Sjálfstæðisflokkurinn, Sósíalistaflokkur Íslands, Viðreisn og Vinstri græn.
Eru þetta jafnmörg framboð og 2017 en í stað Alþýðufylkingarinnar og Bjartrar framtíðar sem ekki bjóða fram koma nýir inn Frjálslyndi lýðræðisflokkurinn og Sósíalistaflokkur Íslands.
Kjörstaðir í Hafnarfirði eru Lækjarskóli og Víðistaðaskóli og hefur ekki verið fjölgað þrátt fyrir mikla fjölgun í Hafnarfirði.
Fjórir kjörstaðir 2003
Árið 2003 voru íbúar 20.720 en þá voru almennir kjörstaðir fjórir, Áslandsskóli, Lækjarskóli, Setbergsskóli og Víðistaðskóli.
Nú þurfa íbúar Valla að fara í Víðistaðaskóla nú til að kjósa.
Á bæjarstjórnarfundi fyrir skömmu lögðu fulltrúar Samfylkingarinnar, Bæjarlistans, Viðreisnar og Miðflokks til að Hafnarfjarðarbær byði upp á frían kosningastrætó á kjördag, úr hverfum sem eiga langt að sækja á kjörstað. Tillagan var felld með atkvæðum Sjálfstæðisflokks en Framsókn sat hjá.
