Í gær var haldið fyrsta frjálsíþróttamót ársins í Kaplakrika.
Þetta var innanfélagsmót og einungis keppt í 1.000 m hlaupi karla og kvenna. Þá kepptu í fyrsta sinn fyrir FH þau Hlynur Ólason, sem kom til FH frá ÍR og Íris Anna Skúladóttir sem kom úr Fjölni.
![](https://www.fjardarfrettir.is/wp-content/uploads/FH-1000-m-hlaup-062-1-1024x685.jpg)
Hlynur er 20 ára og mjög efnilegur, hljóp best 31:50 í 10 km götuhlaupi í fyrra en er að stefna núna á að bæta sig á vegalengdum frá 800 til 5.000 m.
Íris Anna er 32 ára fjögurra barna móðir, sem er búin að æfa með FH-hópnum frá sl. sumri. Hún var á árum áður í landsliðinu í 1.500 til 10.000 m og átti Íslandsmetið í 3.000 m hindrunarhlaupi í mörg ár áður en Andrea Kolbeinsdóttir bætti það. Hún er jafnframt góður götu- og utanvegahlaupari, á best 16:50 í 10 km og 1:23 í hálfmaraþoni og varð þriðja í Laugavegshlaupinu sl. sumar á 5:20 klst. Íris Anna hefur æft mjög vel undanfarið og hyggur á endurkomu í millivegalengdum að sögn Sigurðar P. Sigmundssonar, þjálfara þeirra.
1.000 m hlaup kvenna
![](https://www.fjardarfrettir.is/wp-content/uploads/FH-1000-m-hlaup-017-1-1024x620.jpg)
Keppnin í 1.000 m hlaupi kvenna var mjög spennandi milli og Elína Sóleyjar Sigurbjörnsdóttur og Ísoldar Sævarsdóttur sem er eitt mesta efni landsins í dag. Ísold sigraði eftir æsispennandi endasprett í keppni við Elínu.
- Ísold Sævarsdóttir FH: 2,59.02 mín
- Elín Sóley Sigurbjörnsdóttir FH: 2,59.10 mín
- Íris Anna Skúladóttir FH: 3,03.05 mín
- Íris Dóra Snorradóttir FH: 3,12.98 mín
1.000 m hlaup karla
![](https://www.fjardarfrettir.is/wp-content/uploads/FH-1000-m-hlaup-086-1-1024x611.jpg)
Í karlahlaupinu leiddi Valur Elli Valsson fyrstu fjóra hringina en Hlöðver Jóhannsson og Sigurgísli Gíslason voru í miklum ham á lokahringnum og fóru fram úr honum og Hlöðver nokkuð örugglega. Hlynur meiddist í hlaupinu og varð að hætta.
- Hlöðver Jóhannsson FH: 2,42.85 mín.
- Sigurgísli Gíslason FH: 2,43.82 mín.
- Valur Elli Valsson FH: 2,45.82 mín
- Nick Gísli Janssen FH: 3,08.78 mín
- Hlynur Ólason FH: dnf
![](https://www.fjardarfrettir.is/wp-content/uploads/FH-1000-m-hlaup-100-1-1024x613.jpg)
![](https://www.fjardarfrettir.is/wp-content/uploads/FH-1000-m-hlaup-012-1-1024x603.jpg)
Leiðrétt úrslit kl. 17:30