Uppfært:
Tilkynning frá Veitum:
„Þar sem vel hefur gengið að koma framleiðslu á heitu vatni í gang í Nesjavallavirkjum kemur ekki til neðangreindra lokana. Virkjunin starfar nú á fullum afköstum í hitaveitunni.
Vel hefur gengið að ná upp þrýstingi í þeim hverfum sem urðu fyrir heitavatnslokun í dag og ættu allir að vera komnir með fullan þrýsting innan skamms.“
Vegna bilunar í Nesjavallavirkjun þarf að fara í frekari lokanir á heitu vatni á höfuðborgarsvæðinu en lokað var fyrir heita vatnið í nokkrum hverfum í Kópavogi og Garðabæ fyrr í dag. Þeirri lokun lýkur kl. 18.
Kl. 17-21 er lokað fyrir heitt vatn í eftirfarandi hverfum í Hafnarfirði:
- Setberg
- Vellir
- Hraun
- Ásland
- Hvaleyrarholt
- Dalsás
Engin framleiðsla var á heitu vatni á Nesjavöllum og heildarframleiðslugeta á heitu vatni fyrir hitaveitu höfuðborgarsvæðisins skert um 30% en nú hefur tekist að koma framleiðslu í gang á ný.
Sprenging varð í tengivirki Landsnets á Nesjavöllum snemma í morgun og þrjá af fjórar aflvélar Nesjavallavirkjunar slóu út og síðar voru allar vélar úti.
Við bilunina kom högg á dreifikerfi hitaveitunnar með þeim afleiðingum að leki kom að annarri Reykjaæðinni en þær flytja heitt vatn frá Mosfellsbæ til borgarinnar. Hitaveitugeymar á Reynisvatnsheiði hafa því sem næst tæmst í morgun.
