Snjó hefur kyngt niður á Hafnarfirði og þungfært hefur verið víða þó starfsmenn bæjarins og verktakar hafi hamast við að ryðja götur og stíga.
Snjórinn er þó það mikill að víða myndast miklir skaflar og ökumenn hafa víða átt erfitt með að koma bílum sínum út úr bílastæðum.
Enn snjóar og búist er við að áfram snjói fram yfir hádegi auk þess sem búist er við að vindur aukist og þá er líklegt að færð spillist enn fremur. Spá Veðurstofunnar gerir ráð fyrir allt að 16 m/sek síðar í dag.
Ekki eru allir óhressir með snjóinn og var ekki annað að sjá en að börnin sem ljósmyndari Fjarðarfrétta rakst á hafi notið þess að leika sér í snjónum.
Svipmyndirnar úr snjónum voru teknar í morgun, í gær og sl. föstudag.
Ljósmyndir: © Guðni Gíslason
Forgangsröðun snjómokstur á göngustígum
Skv. korti Hafnarfjarðarbæjar er forgangsröðun á snjómokstri gönguleiða í bænum merkt með litum. Sjá má gagnvirkt kort hér.
- A-stígar, forgangur 1: Blár litur
- B-stígar, forgangur 2: Rauður litur
- C-stígar, forgangur 3: Grænn litur
A-stígar: Hjóla- og gönguleiðir milli hverfa og að bæjarmörkum í fyrsta forgangi unnið af verktaka alla daga vikunnar.
B-stígar: Helstu gönguleiðir. Unnið við snjó og hálkuvarnir af Þjónustumiðstöð og verktaka virka daga milli 07:30 -17:00.
C-stígar: Almennar gönguleiðir. Unnið við snjó og hálkuvarnir af Þjónustumiðstöð og verktaka þegar B stígar eru búnir virka daga milli 07:30 – 17:00
