Hrói Höttur náði einum einstaklings Íslandsmeistaratitli, tveimur Íslandsmeistaratitlum félagsliða og slóu tvö Íslandsmet á Íslandsmeistaramótinu innanhúss 2022 um síðustu helgi.
Eowyn Marie Mamalias fékk silfur í trissuboga kvenna, Auðunn Andri Jóhannesson og Guðjón Reynisson voru ekki langt frá bronsi í sínum keppnisgreinum og fengu bronsverðlaun í trissuboga blandaðri liðakeppni.
Tíundi Íslandsmeistaratitillinn í röð
Guðbjörg Reynisdóttir hélt áfram ótrúlegri sigurgöngu sinni í berbogakvenna með tíunda Íslandsmeistaratitilinn í röð frá árinu 2018, ásamt því að hafa verið efst í undankeppni mótsins og jafna sitt eigið íslandsmet 483 stig, sem Guðbjörg setti í desember 2020. Vert er að geta að Guðbjörg var einnig í fimmta sæti á Evrópumeistaramóti innandyra 2022 í Lasko í Slóveníu í febrúar sl.
Guðbjörg vann öruggan 6-0 á Viktoríu Fönn Guðmundsdóttur í ÍF Akur í úrslitaleiknum.
Guðbjörg varð einnig bráðabanameistari í berboga. Þeirri viðbót við Íslandsmeistaramótið var bætt við til gamans fyrir keppendur sem tilraun, ásamt því að gefa dómurum meiri reynslu í því að dæma bráðabana með aðkomu margra íþróttamanna eftir undankeppni. Í bráðabana skjóta keppendur einni ör og sá sem er næst miðju vinnur eða heldur áfram í næsta hluta keppni. Þó var í þessu tilfelli bikarinn afhentur óháð annarri keppni á Íslandsmeistaramótinu og allir keppendur fengu að spreyta sig að næla í bikarinn. Ör Guðbjargar var næst miðju, óháð kyni keppenda, og hampaði bikarnum.
Íslandsmeistaratitlar Hróa Hattar á mótinu:
- Berbogi kvenna einstaklinga – Guðbjörg Reynisdóttir
- Berbogi blandað lið – Guðbjörg Reynisdóttir og Auðunn Andri Jóhannesson skipuðu lið Hróa Hattar
- Trissubogi kvenna lið – Helga Kolbrún Magnúsdóttir, Eowyn Marie Mamalias og Erla Marý Sigurpálsdóttir skipuðu lið Hróa Hattar
Íslandsmet Hróa Hattar á mótinu:
- Berbogi blandað lið í undankeppni – Guðbjörg Reynisdóttir og Auðunn Andri Jóhannesson með 822 stig
- Trissubogi kvenna lið í undankeppni – Helga Kolbrún Magnúsdóttir, Eowyn Marie Mamalias og Erla Marý Sigurpálsdóttir með 1683 stig
Íslandsmeistaramótið var haldið í Bogfimisetrinu í Dugguvogi 2 Reykjavík helgina 5-6 mars. 44 keppendur tóku þátt á mótinu og keppt var á laugardeginum í berboga- og trissubogaflokkum og á sunnudeginum í sveigboga- og langbogaflokkum.
Finna má heildarúrslit mótsins í úrslitakerfinu á ianseo.net og í mótakerfi BFSÍ
