Það gleymist oft að þegar flokkar eru í keppni um völdin í Hafnarfirði, snýst sú keppni ekki engöngu um setu í bæjarstjórn Hafnarfjarðar heldur þeim mun meira um það góða fólk sem stendur að bakið framboðunum, einstaklingana sem koma meðal annars til með að taka sæti í ýmsu ráðum og nefndum bæjarins, fólk sem vinnur vinnuna og brennur fyrir því að sveitarfélagið standi betur á öllum sviðum.
X-L Bæjarlistinn vill hagsmunapólitíkina út úr bæjarstjórninni, kjörnir fulltrúar eru fyrir fólkið og málefnin í bænum en ekki fyrir fámenna hópa hagsmunaaðila og einstaklinga sem njóta fyrirgreiðslu umfram aðra vegna (réttra) tengsla við meirihlutann.
Við þurfum á Bæjarlistanum að halda í framvarðarsveit íbúa Hafnarfjarðar.
X-L Bæjarlistinn hefur átt sterka fulltrúa og áheyrnarfulltrúa í ráðum og nefndum Hafnarfjarðar á síðasta kjörtímabili og má þar meðal annars nefna, bæjarráð, fjölskylduráð, fræðsluráð, skipulags- og byggingarráð, stjórn Markaðsstofu Hafnarfjarðar, barnaverndarnefnd, fjölmenningarráð, umhverfis og framkvæmdaráð. Einum kjörnum fulltrúa X-L fylgir réttur til setu í nefndum og ráðum Hafnarfjarðarbæjar, það er nauðsynlegt fyrir Hafnarfjörð að X-L fái brautargengi í komandi sveitarstjórnarkosningum svo hægt sé að vinna áfram að þeim málum sem við höfum talað fyrir.
Ef þú sem einstaklingur ert ánægður með stöðu mála í Hafnarfirði í dag og síðustu ára, sáttur með íhaldið, sáttur við hagsmunapólitík, hræddur við breytingar, þá er Bæjarlistinn ekki rétti flokkurinn fyrir þig?
Bæjarlistinn X-L stendur fyrir jákvæðar breytingar, framfarir, umhyggju, náungakærleika, uppbyggingu og arðbæran rekstur sveitarfélagsins.
Týnum ekki rödd Hafnfirðinga, veljum X-L á laugardaginn.
RÖDDIN YKKAR ER RÖDDIN OKKAR,
Jón Ragnar Gunnarsson,
skipar 7. sæti á Bæjarlistanum í Hafnarfirði
