Það er ekki óalgeng sjón að sjá bíla lenda saman á FH-torgi, hringtorginu á mótum Fjarðarhrauns, Flatahrauns og Bæjarhrauns.
Virðist sem flestir árekstrar verði þegar bílar koma Flatahraun úr austri og bílar sem ætla af hringtorginu inn á Bæjarhraun. Oft má sjá að ökumenn, sem koma út Flatahraun, virða ekki rétt ökumanna í innri hring sem ætla inn á Bæjarhraun en skv. slysakorti Samgöngustofu eru árekstrarnir víða um torgið.
Á síðasta ári eru skráðir 33 árekstrar á hringtorginu, þar af 19 við Bæjarhraun en aðeins einu sinni eru skráð minni háttar meiðsli.
Á 10 ára tímabili, frá janúar 2012 til desemberloka 2021 eru skráð 260 umferðaróhöpp á torginu þar af 6 þar sem minni háttar meiðsli hafa orðið. Af þessum 260 umferðaróhöppum voru um 110 við Bæjarhraunið.
Nokkuð harður árekstur var á torginu í dag þar sem ekið var á bifreið sem var á leið út af torginu inn á Bæjarhraun en bifreiðin snarsnérist og endaði á umferðareyju. Var bifreiðin sem ekið var á óökufær eftir áreksturinn.
Það vekur nokkra furðu að allt öðruvísi virðist ekið um torgið á mótum Reykjanesbrautar og Lækjargötu þar sem umferðaróhöpp voru mun færri á sama tímabili.
