Mikil tilhlökkun fyrir komandi verkefni Rauða krossins í Hafnarfirði, Garðabæ og Kópavogi
Verkefni deildarinnar eru fjölbreytt en meginmarkmið verkefnanna er að sporna gegn félagslegri einangrun og tryggja að fólk búi við öryggi og hafi tækifæri til að dafna.
Í vetur gafst deildinni ómetanlegt tækifæri þegar hæfileikaríkur nemandi úr tækniskólanum að nafni Malen Áskelsdóttir hafði samband. Hún var að ljúka sinni seinustu önn fyrir útskrift sem ljósmyndari frá Tækniskólanum. Lokaverkefni í heimildarljósmyndunaráfanga snerist um að fanga dýrmæt augnablik hjá hundavinum Rauða krossins. Verkefnið vann Malen af stakri prýði og er Rauði krossinn einstaklega þakklátur fyrir þetta bjarta og líflega framtak í þágu verkefnisins.
Spennandi tímar eru framundan hjá Hundavinaverkefni RKÍ þar sem verkefnið er að færa út kvíarnar og komið í samstarf við Rauða krossinn í Eyjafirði. Það þýðir að fjórfætlingar og eigendur þeirra geta nú sótt námskeið og þjálfun hjá RKÍ í Eyjafirði og gerst Hundavinir og þar með slegið tvær flugur í einu höggi, átt góða stund saman og látið gott af sér leiða.
Heimsóknarvinir með hunda er eitt af kjarnaverkefnum Rauða krossins og markmiðið er að rjúfa félagslega einangrun einstaklinga með aðstoð hunda. Sjálfboðaliðar heimsækja stofnanir og einstaklinga sem óska eftir því að fá hundavin í heimsókn til sín. Heimsóknirnar eru oftast einu sinni í viku, rúmar 40 mínútur í senn. Líkt og með öll vinaverkefni Rauða krossins þurfa allir sjálfboðaliðar að ganga í gegnum inntökuferli ásamt því að sækja viðeigandi námskeið og fræðslu til að öðlast skilning og færni á því sviði sem þeir hafa valið sér. Verkefni Rauða krossins eru fjölbreytt og flestir geta fundið verkefni og nýtt hæfni sína og þekkingu samfélaginu til góða.
Nánari upplýsingar á heimasíðu Rauða krossins, raudikrossinn.is eða hringja í 565 1222.
