Gamall trébátur Erna HF 25, sem lengi hefur legið við flotbryggju í Flensborgarhöfn, sökk í nótt. Þegar háflóð var stóð aðeins púströrið upp úr.
Báturinn var smíðaður af Trésmiðju Austurlands árið 1971 og er 15 m langur og 25 brúttólestir að stærð. Upphaflega hét hann Hafsúlan RE 77 en varð Hafsúlan SH 7 en áfram í eigu sama eiganda, Halldórs Sveinssonar í Reykjavík.
Eftir það hefur báturinn borið ýmis nöfn og númer, Donna HU 4, Donna ST 4, Donna ÍS 62, Sigurbjörg ST 55, Donna ST 5 og árið 2001 Donna SU 55 skv. upplýsingum á skipamyndir.com.
Frá árinu 2006 hefur báturinn borið heitið Erna HF 25 og verið í eigu Árna M. Sigurðssonar og skráður sem skemmtiskip.
Að sögn Lúðvíks Geirssonar, hafnarstjóra, verður reynt að hífa bátinn upp á næstu dögum og verður hann þá tekinn á þurrt. Segir hann bátinn vera tryggðan.
Flotbryggjan sem báturinn liggur við er orðin lúin, samsett úr steyptum kerjum og trébryggju sem að sögn Lúðvíks er á dagskrá að endurnýja skv. nýju skipulagi.
