Hafnfirðingurinn Erla Eyjólfsdóttir, Hlaupahópi FH, keppti í Lundúnarmaraþoninu fyrir skömmu og bætti þar 8 ára gamlan tíma sinn og kom í mark á 3,30.28 klst.
Það væri vart í frásögur færandi nema fyrir það að Erla er á 62. aldursári.
Með afrekinu sló hún 10 ára gamalt Íslandsmet í aldursflokknum 60-64 um tæpar 4 mínútur.
Varð Erla 13. í sínum aldursflokki og í hópi 8% fremstu kvenna í hlaupinu en alls voru keppendur 48.606.
Alls kepptu 16 Íslendingar í hlaupinu í London og aðeins hin 29 ára María Lovísa Breiðdal hljóp á betri tíma en Erla, á 3,14.09 tímum.
