Ungmennaráð Hafnarfjarðar vill að ungmennahús bæjarins verði sameinuð í nýtt og stærra ungmennahús sem gæti verið staðsett í núverandi húsnæði bókasafns Hafnarfjarðar. Þetta er meðal tillagna sem ungmennaráðið lagði fram á árlegum samráðsfundi ungmennaráðs og bæjarstjórnar Hafnarfjarðar í dag.
Í máli ungmennanna kom fram að ungmennahús Hafnarfjarðar væru orðin sprungin vegna mikillar aðsóknar. Þörf sé á stærra húsnæði þar sem hægt væri að bjóða upp á fjölbreytt hópastarf og mæta þörfum ólíkra hópa, t.d. ungmennaráðs sem þyrfti betri fundaraðstöðu. Núverandi húsnæði bókasafns Hafnarfjarðar væri tilvalið þar sem fyrir liggur að bókasafnið flytji bráðum í nýtt húsnæði.
Ungmennaráð lagði einnig til að fulltrúar ráðsins fái greidd laun fyrir störf sín líkt og tíðkist í fjölda annarra sveitarfélaga og að ungmenni fái sæti við borðið í fleiri nefndum og ráðum en bara íþrótta- og tómstundanefnd. Ungmennin vilji hafa rödd þar sem ákvarðanir eru teknar. Þá var lagt til að sveitarfélagið auki fræðslu um stjórnmál í grunnskólum og beiti sér fyrir lækkun kosningaaldurs í sveitarstjórnarkosningum í 16 ár.
Tillögur ungmennaráðs voru alls 12 að þessu sinni:
- Ungmennaráð Hafnarfjarðar leggur til að ungmennaráðið fái að koma að ráða- og nefndarstarfi í auknum mæli. Lagt er til að Ungmennaráðið fái ýmist áheyrnarfulltrúa eða almennan fulltrúa í ráð og nefndir.
- Ungmennaráð Hafnarfjarðar leggur til að bæjarstjórn auki fræðslu um stjórnmál og kosningar í grunnskólum og beiti sér í kjölfarið fyrir lækkun kosningaaldurs í 16 ár.
- Ungmennaráð Hafnarfjarðar leggur til að sveitarfélagið geri enn betur í að tryggja aðgengi fatlaðs fólks til jafns við aðra, sérstaklega aðgengi að íþróttum.
- Ungmennaráð Hafnarfjarðar leggur til að því verði tryggð viðunandi aðstaða til að funda þar sem lítill vinnufriður er í Hamrinum ungmennahúsi.
- Ungmennaráð Hafnarfjarðar leggur til að sveitarfélagið meti starf ungmennaráðs að verðleikum og greiði fulltrúum laun fyrir fundarsetu.
- Ungmennaráð Hafnarfjarðar leggur til að Hafnarfjarðarbær ráðist í róttækari aðgerðir í loftslagsmálum og setji á fót nefnd um loftslagsmál.
- Ungmennaráð Hafnarfjarðar leggur til að félagsmiðstöðvar bæjarins skipuleggi sameiginlega hittinga að minnsta kosti einu sinni í mánuði.
- Ungmennaráð Hafnarfjarðar leggur til að ráðist verði í frekari aðgerðir til að sporna gegn vaxandi fordómum í garð hinsegin fólks í samfélaginu og að brugðist verði við fordómum innan veggja skólanna.
- Ungmennaráð Hafnarfjarðar leggur til að Hafnarfjarðarbær skipti Mentor út fyrir
- Ungmennaráð Hafnarfjarðar leggur til að ungmennahús Hafnarfjarðar verði sameinuð í eitt stórt ungmennahús sem gæti til dæmis verið staðsett í núverandi húsnæði bókasafns Hafnarfjarðar að Strandgötu 1. Tryggja þarf mótor-hluta Músík og mótor hentugt framtíðarhúsnæði.
- Ungmennaráð Hafnarfjarðar leggur til að ókeypis verði í strætó fyrir börn yngri en 18 ára og að ferðir leiðar 19 verði tíðari.
- Ungmennaráð Hafnarfjarðar leggur til að Hafnarfjarðarbær bjóði upp á íslenskukennslu fyrir.
Fréttatilkynning.
