Verslunin Pødus var opnuð á efri hæðinni í Firði í síðustu viku.
Það eru þeir félagarnir Hlynur Snær Stefánsson, Guðjón Pétur Lýðsson og Brynjólfur Willumsson sem reka verslunina.
Vörur verslunarinnar segja þeir höfða helst til stráka og bjóða þeir eingöngu upp á íslensk vörumerki. Þar má finna fatnað frá Pandagang, skartgripi frá Iced Out og húfur frá Mold Reykjavík.
Eigendurnir hafa sterka tengingu inn í fótboltaheiminn og eru vörur þeirra vinsælar þar. Nefna þeir sérstaklega hvítu Pandagang sokkana sem þeir segja hafi notið mikilla vinsælda.
Stefna þeir á að auka vöruúrvalið á næstunni og bjóða upp á enn fleiri íslensk vörumerki.
Verslunin er á 2. hæð í verslunarmiðstöðinni Firði.
