Á laugardaginn kl. 13-15 mun Iryna Kamienieva, myndlistarmaður og sýningarstjóri, leiða skapandi listasmiðju fyrir fjölskyldur á úkraínsku í Hafnarborg.
Í smiðjunni verður börnum og fullorðnum boðið að búa til litríka og skemmtilega skúlptúra úr margvíslegum efnivið. Þátttakendur fá sömuleiðis tækifæri til að skoða sýningar safnsins í því skyni að leita að hugmyndum fyrir sína eigin listsköpun.
Iryna Kamienieva er myndlistarmaður og sýningarstjóri frá Úkraínu. Hún hefur verið búsett á Íslandi frá árinu 2022 þar sem hún hefur bæði starfað á vettvangi myndlistar og við móttöku flóttafólks.
Á mínu máli er viðburðadagskrá sem miðar að því að auka aðgengi fólks með margs konar bakgrunn að Hafnarborg með því að bjóða gesti velkomna á ólíkum tungumálum.
Viðburðurinn er samstarf Hafnarborgar og GETU – hjálparsamtaka. Verkefnið er styrkt af safnasjóði. Aðgangur er ókeypis.
