Svo virðist sem skiptar skoðanir séu um staðsetningu á lítilli grenndarstöð sem skv. samþykktu skipulagi á að koma í fyrstu beygjuna í Brekkuásnum, þar sem Ásvallabrautin átti að liggja. Þar hefur verið strætóstoppistöð þar sem vagnarnir snéru við og því nokkuð rúmt pláss.
Staðsetning skv. deiliskipulagi
Gerð var breyting á deiliskipulagi hverfisins á síðasta ári en breytingin fólst í að þar sem áður var stoppistöð fyrir strætó er gert ráð fyrir svæði fyrir grenndarstöð til flokkunar á endurvinnanlegu efni. Grenndarstöð er aðgreind frá götu með gróðurbeði og gert er ráð fyrir skjólvegg í kringum flokkunarsvæðið.
Þegar deiliskipulagsbreytingin var auglýst komu athugasemdir frá þremur aðilum, Veitum sem hafði áhyggjur af hitaveitulögn sem þarna er og tveimur íbúum sem töldu staðsetninguna ekki henta vegna veðurs, umferðaröryggi yrði skert og að ásýnd hverfisins yrði ljótt. Bent var m.a. á að hverfið væri ekki það stórt að grenndarstöð væri nauðsynleg.
Því var svarað svona: „Samkvæmt nýjum lögum er gert ráð fyrir grenndarstöðvum í nágrenni við íbúa og þessi staðsetning er hugsuð til að uppfylla þá skyldu.“
Ekki var tekið undir aðrar athugasemdir nema að möguleg gætu orðið óþægindi í umferðinni ef notendur sýndu ekki aðgát.
Aðeins þrír efnisflokkar á grenndarstöðinni
Rósa Guðbjartsdóttir bæjarstjóri blandaði sér í umræðuna á íbúasíðu Ásvalla III á Facebook: „Til að upplýsa og mögulega koma í veg fyrir misskilning, þá eru aðeins þrír efnisflokkar fyrirhugaðir í grenndarstöðina. Eftir að meiri flokkun hófst við heimili verða nýjar grenndarstöðvar ekki með t.d. pappa, plasti eða almennt rusl og eldri stöðvum verður breytt í áföngum. Þarna er fyrirhugað að setja upp flokkun fyrir textíl, málma og gler – það ætti að breyta ásýnd og umhverfi grenndarstöðvanna. Fjölgun grenndarstöðva er til að auka þjónustu við íbúana og þá fækka ferðum t.d. á Sorpu.“
Þá hefur komið fram að Sorpa er að tvöfalda fjölda fatagáma en töluvert hefur verið um yfirfulla slíka gáma. Einnig hefur komið fram að í gámunum verða snjallmælar sem eiga að segja til um það hvenær þurfi að losa.
Undirskriftasöfnun til að mótmæla staðsetningunni
Berglind Ósk Alfreðsdóttir, íbúi næst við grenndarstöðina hefur verið áberandi í andstöðu við staðsetninguna og hefur hrundið af stað undirskriftalista fyrir íbúa hverfisins þar sem staðsetningunni er mótmælt sem skipulagsslysi.
Á fjórða tímanum í dag voru komnar 163 undirskriftir en listinn var stofnaður fyrir tveimur dögum. Af þeim hafa 46 kosið að birta ekki nafn sitt.
En hvað segja íbúar á samfélagsmiðlum?
Nokkur umræða hefur verið á samfélagsmiðlum um staðsetningu á grenndarstöðinni og þeir sem tjá sig eru lang flestir á móti þessari staðsetningu og svo virðist sem enginn vilji hafa þetta í hverfinu.
Dæmi um ummæli:
- „Þurfum við ekki bara að ganga vel um þetta?“
- „Þetta er algjör sjónmengun á þessu fallega útsýni sem við höfum, ömurleg staðsetning á þessu…“
- „Ég er reyndar þeirrar skoðunar að staðsetningin sé ágæt og þægilega í leiðinni þegar farið er út úr hverfinu. Finnst ekki hægt að gefa sér það fyrirfram að við – íbúarnir sem munum nýta þessa aðstöðu – göngum illa um hana.“
- „Held að það sé líklegra að við myndum geta fengið myndavélakerfi sem tekur upp þetta svæði, og myndi vera hvetjandi til góðrar umgengni…“
- „Já allan daginn, það er til nóg af öðrum svæðum.“
- „Við viljum ekki skjólvegg og gáma sem hindra útsýnið. Finnið aðra staðsetningu.“
- „Þetta er subbulegt í íbúðarhverfi alveg sama hvað fer í þessa gáma burtu með þetta úr hverfinu.“
- „Þetta er algjörlega galin staðsetning á ruslahaug og hvort sem verður gengið um snyrtilega eða ekki.“
