Húsgagnaverslunin Bústoð opnaði í síðustu viku, nýja húsgagna- og gjafavöruverslun að Miðhrauni 24 í Garðabæ, í sama húsi og Bónus opnaði fyrr á árinu, en verslunin snýr að Reykjanesbrautinni.
Eigendur og rekstraraðilar eru Björgvin Árnason og Birgitta Ósk Helgadóttir.
Bústoð er rótgróin húsgagnaverslun, sem hefur verið starfrækt frá árinu 1975 og alla tíð verið staðsett í Reykjanesbæ. Að sögn eigenda hefur hún notið mikilla vinsælda í gegnum árin meðal höfuðborgarbúa, sem hafa gert sér ferð suður með sjó til að versla falleg og vönduð húsgögn á góðu verði.
Það hefur því verið á teikniborðinu lengi að opna á höfuðborgarsvæðinu og hafa eigendur nú látið verða af því.
Verslunin í Miðhrauni er falleg, opin, björt og notaleg. Þar verður boðið upp á allar vinsælustu vörur félagsins ásamt töluvert af nýjungum. Verslunin er með um 500 m² sýningarsal með stærstu stólahillu landsins að sögn eigenda.
Ljósmyndir: Elsa Katrín Ólafsdóttir
