Metþátttaka í Ratleik Hafnarfjarðar í sumar og þátttakendur fylltu Hafnarborg

Eftir gg

10. október 2024

Ratleikur 2024 uppskeruhátíð-45 — Hluti þeirra fjölmörgu sem fengu verðlaun í Ratleik Hafnarfjarðar 2024 ásamt Guðna Gíslasyni umsjónarmanni leiksins

Metþátttaka var í Ratleik Hafnarfjarðar í ár sem stóð yfir frá því í júníbyrjun til 24. september.

Þátttakendur leita að 27 ratleiksmerkjum sem eru staðsett víðs vegar í bæjarlandi Hafnarfjarðar og jafnvel út fyrir það. Sum merkjanna eru þó inni í bænum en leiknum skipt í þrennt og þeir sem finna og skila lausnum frá 7 stöðum eru Léttfetar, þeir sem skila 18 merkjum eru Göngugarpar og þeir sem klára leikinn eru Þrautakóngar.

Í ár skiluðu 294 inn lausnum en aldrei hafa svona margir skilað inn. Það er engin skylda að skila inn og fjölmargir taka þátt án þess að skila. Auk þess þarf að finna a.m.k. 9 merki til að geta skilað. Alls tóku um 3.000 manns ratleikskort sem segir svolítið um áhugann enda má iðulega sjá fólk með ratleikskort á sumrin í upplandi bæjarins.

Flestir fóru á alla staðina

Leiðinlegt veður í sumar hafði greinilega lítil áhrif á þátttakendur og rúmlega helmingur þeirra sem skilaði inn lausnum hafði farið á alla staðina, 150 manns sem er líka nýtt met. Ætla má að fólk gangi allt að 80 km í leit að öllum merkjunum. 48 fóru á a.m.k. 18 staði og 96 fór á a.m.k. 9 staði sem er mikil aukning frá í fyrra og af þeim voru 33 börn 12 ára og yngri.

Áætla má að komið hafi verið að ratleiksstöðum um 7.500 sinnum í sumar.

Þátttakendur af öllu höfuðborgarsvæðinu

Þó flestir þátttakendur séu Hafnfirðingar þá fjölgar þeim stöðugt sem koma úr öðrum sveitarfélögum og í ár voru þátttakendur frá öllu höfuðborgarsvæðinu. Þá voru einnig þátttakendur frá Noregi og Nýja Sjálandi sem dvöldu á Íslandi í sumar.

Um 200 manns mætti á uppskeruhátíð í Hafnarborg

200 þátttakendur mættu á uppskeruhátíðina.

Sífellt fleiri mæta á uppskeruhátíð Ratleiksins en í ár var metþátttaka þegar 200 manns mætti á hátíðina sem er 40% aukning frá fyrra ári. Á uppskeruhátíðinni er farið yfir leikinn í máli og myndum og í ár voru veittir 38 vinningar, þrír vinningar í hverjum flokki og 29 útdráttarvinningar sem eru bónusvinningar fyrir þá sem mæta. Fjölmörg fyrirtæki hafa af rausnarskap gefið vinningana sem í ár voru að verðmæti um 450 þúsund kr.

Þrautakóngur 2024

Steinunn M. Þórketilsdóttir er Þrautakóngur Ratleiks Hafnarfjarðar 2024 og fékk hún Scarpa gönguskó frá Fjallakofanu.

Þrautakóngur ársins 2024 er Steinunn M. Þórketilsdóttir (67) úr Garðabæ, Þórður Guðbjörnsson (56) fékk 2. verðlaun og Jóhann Atli Hafliðason (32) fékk 3. verðlaun.

Göngugarpur 2024

Elín Henriksen er Göngugarpur Ratleiks Hafnarfjarðar 2024 og fékk hún mánðarkort í TRX hjá Elín.is og höfuðljós frá Fjallakofanum

Elín Henriksen (53) úr Kópavogi er Göngugarpur ársins, Alexía Arna Benjamínsdóttir, 8 ára hreppti 2. verðlaun og Helga Guðlaug Jóhannsdóttir (44) fékk 3. verðlaun.

Léttfeti 2024

Elmar Bjarki Möller er Léttfeti Ratleiks Hafnarfjarðar 2024 og fékk hann 6 mánaða kort í Sundlaugar Hafnarfjarðar.

Elmar Bjarki Möller, 8 ára úr Garðabæ er Léttfeti ársins, Ólafur Skúli Indriðason (63) hreppti 2. verðlaun og Katla Gunnarsdóttir Silva (24) hlaut 3. verðlaun.

Fjallakofinn gaf aðalvinninginn, Scarpa gönguskó og fleiri vinninga og aðrir sem gáfu vinninga voru Sundlaugar Hafnarfjarðar, Elin.is, Fjarðarkaup, Altis og Von mathús.

Dregnir voru út 29 útdráttarvinningar til þeirra sem mættu á staðinn en þeir sem gáfu vinninga voru Gróðrarstöðin Þöll, Tilveran veitingahús, Rif veitingastaður, Krydd, veitingastaður, Ban Kúnn veitingastaður, Kebab Firði, American Style, Figo pizza, Músik og sport, Sundlaugar Hafnarfjarðar, Fjallakofinn og Gormur.is.

Fjölmargir styrktaraðilar

Sem fyrr er það Hönnunarhúsið ehf. sem gefur út leikinn í samvinnu við Hafnarfjarðarbæ og Guðni Gíslason leggur leikinn með góðri aðstoð Ómars Smára Ármannssonar. Rio Tinto á Íslandi er aðalstyrktaraðili leiksins í ár.