Verðbólgan hefur leikið landsmenn grátt og fátt virðist duga til að draga úr henni. Jafnvel spár um minni hagvöxt, aukið atvinnuleysi og jafnvel fækkun ferðamanna virðist ekki ætla að skila okkur minni verðbólgu.
Húsnæðisliðurinn er allur tekinn inn í verðbólguútreikninga öfugt við það sem gert er í mörgum viðmiðunarríkjum og skortur á lóðum og íbúðum hefur snarhækkað fasteignaverð. Við það hækka fasteignaskattar og verðbólga. Hins vegar lækkaði verðbólga á milli mánaða og var það m.a. sagt vegna þess að barnafólk þyrfti ekki lengur að borga fyrir máltíðir úr skólum úr eigin vasa, greiðslan færi nú úr sama vasa í formi skatta sem þó voru ekki hækkaðir. Foreldrarnir setja auðvitað peninginn beint inn á hávaxtareikning því eyðsla myndi hækka verðbólguna. En ég er ekki hagfræðingur en hef rekið heimili og fyrirtæki í langan tíma sem auðvitað telur ekkert.
Er ekki kominn tími til að ríkisvaldið kynni á mannamáli hvernig verðbólgan á Íslandi er reiknuð út. Fylgir útreikningur neyslumynstri meirihluta landsmanna eða eru „vísitölubrauð“ ennþá notuð við útreikninginn.
Launþegar eru hvattir til að spara, gera minni kröfur um laun og fækka utanlandsferðum. Ríkisvaldið verðlaunar erlenda framleiðendur kvikmynda til að koma til landsins og endurgreiðir um allt að 35% af öllum kostnaði sem fellur til á landinu, vegna þess að það skortir atvinnu á Íslandi og stöðnun á sér stað. Eða er það ekki þveröfugt? Hversu erfitt er að fá fólk í vinnu? Við þurfum að flytja inn stöðugt fleira fólk til að sinna því sem Íslendingar anna ekki eða jafnvel vilja ekki. Er þetta ekki verðbólguhvetjandi?
Á meðan fólk sem kann heimilisbókhald skilur ekki aðgerðir Seðlabankastjóra og ríkisstjórnarinnar þá er ekki von á friði í þjóðfélaginu.
Hvers vegna er betra að auka vaxtakostnað ungs fólks í sínu fyrsta húsnæði og færa þær fjárhæðir til viðskiptabankanna?
—
Umferðin í gegnum Hafnarfjörð er orðin gríðarlega þung og þrátt fyrir von um stokk eða göng undir Setbergið eru bara líkur á að umferðin aukist enn meira. Nýr Tækniskóli kallar á mikla umferð um miðbæinn, stórskipahöfn sem ennþá virðist vera á stefnuskrá bæjarstjórnar gæti haft skelfileg áhrif á umferð um Reykjanesbraut. Þétting byggðar á hafnarsvæðinu kallar á enn meiri umferð um miðbæinn og sífellt aukinn stóriðnaður syðst í bænum veldur mikilli umferð stórra flutningabíla í gegnum bæinn.
Erum við nokkuð að gleyma að hugsa umferðarmálin fram í tímann
Guðni Gíslason ritstjóri.
