Unnið hefur verið við að leggja nýja skolplögn meðfram Hlíðarbergi frá Stekkjartorgi að Klettahlíð.
Upphaflega var tilkynnt á heimasíðu Hafnarfjarðarbæjar að Hlíðarbergi væri lokað að hluta til frá Hlíðartorgi [líkleg átt við Stekkjartorg, enda Hlíðartorg á Reykjanesbraut] að Dalshlíð frá og með föstudeginum 23. ágúst kl. 10 til mánudagsins 23. september kl. 16.30.
Ekkert bólaði á opnun götunnar og íbúum fannst lítið ganga og kölluðu eftir svörum og fengu þá svör um að opnað yrði 7.-8. október. Fyrri hluta verksins lauk ekki fyrrr en í þessari viku en heildarverkinu átti skv. áætlun að ljúka 15. október.
Nú hefur verið opnað frá Stekkjartorgi að Dalshlíð en þaðan er lokað að Klettahlíð og er seinni hluti verksins nú ný hafinn.
Verklok áætluð um mánaðamót nóvember – desember
Að sögn Guðmundar Elíassonar, umhverfis- og veitustjóra hjá Hafnarfjarðarbæ eru verklok ná áætluð um mánaðamótin nóvember – desember.
Aðspurður um hvað hafi ollið þessum töfum segir Guðmundur að verktaki hafi borið við að eitthvað hafi verið um að skurðbrúnir hafi hrunið þannig að hafi þurft að grafa eftir en sagið að verktakinn ætli að bæta við vélum og mannskap til að verkið gangi hraðar.
Taka hefur þurft niður ljósastaura og setja upp aftur auk þess sem lagðir hafa verið rafmagnskaplar.
Var þetta haft eftir Guðmundi eftir að hann hafi setið verkfund með verktakanum í gær, fimmtudag.
Aðrar upplýsingar á vef bæjarins
Hins vegar segir á heimasíðu bæjarins: „Vegna vegaframkvæmda verður Hlíðarberg, frá Dalshlíð að Klettahlíð lokað frá og með fimmtudeginum 24.október kl. 10:00, til mánudagsins 11. nóvember kl.16:30.“
Miðað við hraða verksins í fyrri áfanga þykir ólíklegt að þessi tímasetning standist enda ekki í samræmi við upplýsingar af verkfundi sl. fimmtudag.
