Hafnfirðingum hefur fjölgað á einu ári um 3,3% og eru nú 31.330.
Af þeim eru 4.810 með erlendan ríkisborgararétt og hefur þeim fjölgað um 14,3% frá sama tíma í fyrra. Eru þeir því 15,3% af bæjarbúum og á höfuðborgarsvæðinu er hlutfallið aðeins hærra í Reykjavík þar sem það er 20,8%.
Hefur erlendum ríkisborgurum fjölgað mest í Garðabæ, þar sem þeir eru þó hlutfallslega fæstir eða 7,8% Garðbæinga. Þar hefur þeim fjölgað um 27% á meðan íbúum í heild hefur fjölgað um 5,6% sem er líka mesta fjölgunin á höfuðborgarsvæðinu.
148% fjölgun á tíu árum
Þegar skoðað er 10 ára tímabil þá kemur í ljós að íslenskum ríkisborgurum, búsettum í Hafnarfirði hefur aðeins fjölgað um 4,8% á sama tíma og erlendum ríkisborgurum hefur fjölgað um 148%. Fjölgun allra Hafnfirðinga á sama tímabili er 15%.
