Hafnfirðingurinn Róbert Ísak Jónsson er tilnefndur sem Framúrskarandi ungur Íslendingur 2024, í flokkunum einstaklingssigrar og/eða afrek.
Hvatningarverðlaun
Verðlaunin Framúrskarandi ungir Íslendingar eru fyrst og fremst hvatningarverðlaun til ungs fólks sem eru að takast á við krefjandi og athyglisverð verkefni á sínu sviði og hafa verðlaunin verið haldin óslitið síðan árið 2002.
Tilnefningar til framúrskarandi ungra Íslendinga voru mun fleiri en þær hafa verið undanfarið og bárust um 200 tilnefningar. „Það var vandasamt og erfitt verkefni að vinna úr. Það er því ljóst að við erum rík af ungu fólki sem er að gera vel á sínu sviði,“ segir Margrét Helga Gunnarsdóttir, verkefnastjóri Framúrskarandi ungur Íslendingur 2024.
Dómnefndin hittist í síðustu viku og valdi topp tíu hópinn og sigurvegara sem verður tilkynntur á verðlaunaafhendingunni þann 4. desember nk.
Í dómnefnd í ár voru Eliza Reid rithöfundur og fyrrum forsetafrú, Freyja Steingrímsdóttir framkvæmdastjóri Blaðamannafélags Íslands, Aníta Sóley Scheving Þórðardóttir, framúrskarandi ungur Íslendingur 2023 og nemi, Kjartan Hansson senator í JCI og hagfræðingur hjá Seðlabanka Íslands og Alma Dögg Sigurvinsdóttir Landsforseti JCI Íslands 2024.
Miðvikudaginn 4. desember fer formleg verðlaunaafhending fram, þar sem Halla Tómasdóttir, forseti Íslands mun afhenda Topp tíu hópnum viðurkenningu og verður vinningshafi úr hópnum kynntur sem hlýtur titilinn Framúrskarandi ungur Íslendingur ársins 2024.
Þau voru tilefnd
Eva Michelsen
Störf á sviði viðskipta, frumkvöðla og/ eða hagfræði
Eva stofnaði og rekur deilieldhúsið Eldstæðið. Eldstæðið er vottað atvinnueldhús fyrir smáframleiðendur og matarfrumkvöðla, fyrsta sinnar tegundar af þessum skala á Íslandi. Hún sá vöntun á íslenskum markaði fyrir matarfrumkvöðla og auðveldar það öðrum frumkvöðlum að taka sín fyrstu skref í rekstri á öruggan og hagkvæman hátt – prufa sig áfram áður en farið er í stórar fjárfestingar.
Embla Bachmann
Störf/ afrek á sviði menningar
Embla Bachmann gaf út bókina Stelpur stranglega bannaðar! árið 2023 og er það hennar fyrsta bók. Í ár, 2024 gaf hún út bókina Kærókeppnin. Hún var sú yngsta til að hljóta tilnefningu til Íslensku bókmenntaverðlaunanna árið 2023 fyrir bókina sína Stelpur stranglega bannaðar! Embla starfar einnig á RÚV við útvarpsþáttagerð fyrir börn og ungmenni á Rás 1 og heita þættirnir hennar “Hvað ertu að lesa?” Embla er líka hluti af Krakkafréttateyminu á RÚV.
Guðjón Reykdal Óskarsson
Störf /uppgötvanir á sviði læknisfræði
Guðjón er doktor í mannerfðafræði og hefur meðal annars rannsakað sinn eigin sjúkdóm, Duchenne vöðvarýrnun. Hann hefur tekið þátt í birtingu ýmissa fræðigreina í mannerfðafræði. Einnig hélt hann úti hlaðvarpsþættinum Calling Munro þar sem hann og vinir hans spjölluðu á léttu nótunum um dægurmál, heimspeki og vísindi.
Kristfríður Rós Stefánsdóttir
Störf/ afrek á sviði menningar
Kristfríður Rós hefur gefið mikið af sér til Snæfellsbæjar þar sem hún býr og þá sérstaklega til menningarmála á bæði íþrótta- og tómstundasviði. Má til dæmis nefna að hún hefur nýtt styttingu sína í vinnunni til að sjá um byrjenda boltann fyrir leikskólaaldur og íþróttaskólann á föstudögum, þar sem hún þjálfar fyrir ungmennafélagið.
Ingólfur Snær Víðisson
Störf á sviði mannúðar- eða sjálfboðaliðamála
Ingólfur Snær er mikill leiðtogi þegar kemur að stuðningi við jaðarsetta hópa á Íslandi. Í dag vinnur hann sjálfboðaliðastarf fyrir Afstöðu, samtök sem styðja fanga, fyrrverandi fanga og aðstandendur þeirra. Ingólfur fer ekki einungis í öll fangelsi landsins sem hluti af vettvangsteymi Afstöðu, heldur sér hann sérstaklega um að hitta ungt afbrotafólk, börn í meðferð og neyðarvistun. Á Litla-Hrauni, stærsta fangelsi landsins, leiðir hann mikilvægt starf á meðferðargangi og styður fanga í gegnum krefjandi ferli betrunar og endurhæfingar.
Nanna Kristjánsdóttir
Leiðtogar / afrek á sviði menntamála
Nanna hefur lagt mikið til stærðfræðisamfélagsins, og raunar vísindasamfélagsins alls, með frumkvæði sínu og dugnaði. Hún stofnaði og hefur séð um framkvæmd námsbúðanna Stelpur diffra þar sem stelpur og stálp á aldrinum 16-18 ára koma saman í eina viku til að vinna að verkefnum tengdum stærðfræði og hitta fjölbreyttan hóp kvenna með bakgrunn í greininni. Nanna hefur unnið ötullega að því að auka áhuga og sjálfstraust ungra nemenda, vinna gegn kynjahalla í stærðfræði og tengdum greinum og kynna stærðfræði og vísindi fyrir börnum og unglingum. Stelpur diffra hafa verið haldnar á hverju sumri frá árinu 2021 en sumarið 2024 kom hún einnig á fót námsbúðunum Kennarar diffra fyrir starfandi grunn- og framhaldsskólakennara.
Ólöf Bjarki Antons
Störf á sviði siðferðis- og/eða umhverfismála
Ólöf Bjarki hefur verið öflugt í samtökum Hinsegins fólks og barist fyrir réttlæti trans fólks. Hán hefur staðið fyrir mikilli fræðslu um málefni trans fólks, komið fram í útvarpi og sjónvarpi og upplýst hvernig trans fólk vill láta tala við sig. Ólöf Bjarki var formaður Trans Íslands árin 2022-2024 og fékk félagið Mannréttindaverðlaun Reykjavíkurborgar 2023. Rökstuðningur fyrir verðlaununum var sú að félagið hafi með starfi sínu valdið grundvallarbreytingu á skilningi fólks á kynjajafnrétti og hefur Ólöf Bjarki tekið mikinn þátt í þessu starfi.
Rima Charaf Eddine Nasr
Framlag til barna, heimsfriðar og/eða mannréttinda
Ríma hefur unnið brautryðjandi starf í félagasamtökunum Læti! Hún hefur verið ómissandi í Rokkbúðum samtakanna sem er fyrir 10-12 ára og 13- 16 ára börn, sérstaklega vegna stuðnings við arabískumælandi börn sem mörg hver komu nýlega frá stríðshrjáðum svæðum. Þekking hennar og hæfni til að hjálpa þessum börnum að aðlagast nýjum aðstæðum var lykilatriði í að tryggja að þeim líði sem best í búðunum.
Róbert Ísak Jónsson
Einstaklingssigrar og/eða afrek
Róbert Ísak Jónsson er afreks íþróttamaður og sundkappi. Hann hefur sett fjölda Íslandsmeta og er margfaldur Íslandsmeistari í sundi. Hann vann brons á Evrópumeistaramóti fatlaðra í sundi og hafnaði í 6. sæti í úrslitum í 100 metra Flugsundi París 2024 í flokki S14 Róbert stóð sig gríðarlega vel á Ólympíumótinu. Hann hefur verið ötull talsmaður fyrir hreyfingu hjá fötluðum börnum og hefur sett sér það markmið að fá fleiri fötluð börn til að stunda íþróttir. Þar sem því miður stunda aðeins 4% fatlaðra barna á Íslandi íþróttir miðað við yfir 80% ófatlaðra stunda íþróttir á Íslandi. Á Ólympíumótinu í Tókýó 2021 varð hann sjötti í 100 metra flugsundi, tíundi í 100 metra bringusundi og sjötti í 200 m fjórsundi
Tinna Hrund Hlynsdóttir Hafberg
Störf á sviði mannúðar- eða sjálfboðaliðamála
Tinna Hrund er frá Ísafirði og hefur hún vakið athygli fyrir mikið og óeigingjarnt starf í þágu síns samfélags. Hún hefur tekið að sér ýmsar ábyrgðarstöður samfélagsins og staðið sig vel. Tinna stofnaði félagið Stöndum saman Vestfirðir árið 2016 ásamt Hólmfríði Bóasdóttur og Steinunni Guðnýju Einarsdóttur og gerðist Tinna formaður félagsins. Markmið félagsins er að standa saman að því að bæta samfélagið og hafa þær verið ötular í því að safna fyrir ýmsum tækjum og tólum sem hefur vantað í heilbrigðiskerfið í litlum bæjum á Vestfjörðum.
