247 kepptu í þriðja 5 km hlaupi FH í blíðskaparveðri

Hafnarfjörður skartaði sínu fegursta þegar hlauparar víðs vegar að, á öllum aldri og ýmsum getustigum mættu til leiks í miðbæ Hafnarfjarðar í gær en kl. 19 hófst þar keppni í 5 km götuhlaupi. Var þetta þriðja og síðasta hlaupið í árlegri hlauparöð sem Hlaupahópur FH stendur fyrir.

Hlaupið var frá Strandstígnum við Fjörukrána og hlaupið vestur og norður fyrir Hrafnistu og snúið við og hlaupin sama leið meðfram sjónum.

1. Arnar Pétursson (26) úr ÍR varð fyrstur á 15,37 mín. sem er næst besti tími sem náðst hefur í þessum hlaupum. Hefur hann því unnið öll þrjú hlaupin.
2. Ingvar Hjartarson (23) úr Fjölni varð annar á 16,11 mín.
3. Þórólfur Ingi Þórsson (41) úr ÍR varð þriðji á 16,20 mín og setti hann aldursflokkamet í 40-44 ára flokki í 5 km götuhlaupum.

1. Arndís Ýr Hafþórsdóttir (29) úr Fjölni varð fyrst kvenna og og í 6. sæti á 17,52 mín. Hún varð fyrst kvenna í öllum þremur hlaupunum og setti í gær nýtt brautarmet.
2. Elín Edda Sigurðardóttir (28) úr ÍR varð önnur kvenna og í 12. sæti á 18.39 mín.
3. Andrea Kolbeinsdóttir (18) úr ÍR varð þriðja kvenna og í 15. sæti á 18,56 mín.

Frá 10 til 70 ára hlauparar

Keppendur voru á öllum aldri en þeir yngstu voru 10 ára og sá elsti var 70 ára. Meðalaldurinn var hins vegar um 40 ár og var kynjahlutfall nokkuð jafnt, 121 konur og 127 karlar. Til gamans má geta að meðalaldur kvenna og karla var mjög svipaður en meðaltími karla í hlaupinu var 22,50 mín en meðaltími kvenna var 27,41 mín.

Flestir keppendur komu úr Hlaupahópi FH, 33 en næst flestir komur úr Val og Stjörnunni, 12 úr hvoru félagi. Ellefu keppendur komu úr Mömmuskokki, 10 frá Haukum og 8 frá Álftanesi og Flandra í Borgarnesi. Hins gáfu 74 ekki upp neitt félag við skráningu.

Mikil ánægja var með mótið, skilyrði hin allra bestu og keppendur hlupu hver á sinni forsendu og allir nutu þess að vera með.

Fjölmargar myndir má sjá á Facebooksíðu Fjarðarfrétta.

Úrslit: (Má sjá með aldursflokkum hér)

Ummæli

Ummæli