Maður og kona voru flutt á sjúkrahús eftir harðan árekstur fulllestaðs malarflutningabíls og jeppa sem dró kerru fulla af grjóti. Ekki virtist fólkið vera alvarlega slasað en þó nokkra stund tók að ná fólkinu úr bílnum.
Áreksturinn varð um kl. 14 í gær á Hringhellu á mótum Berghellu og Hraunhellu en töluverð umferð malarflutningabíla er þarna um vegna framkvæmda við ný mislæg gatnamót Krýsuvíkurvegar og Reykjanesbrautar.
Virðist sem jeppanum hafi verið beygt inn á Hraunhellu af Hringhellu en malarflutningabíllin kom suður Hraunhellu frá Krýsuvíkurvegi.
Eins og sjá má á meðfylgjandi myndum var áreksturinn nokkuð harður, malarflutningavagninn skellur á vinstri hlið jeppans og kerrunnar sem slitnar af bílnum, grjótið úr kerrunni endar hægra megin við malarflutningabílinn og dekk af kerrunni en jeppinn endar á hliðinni vinstra megin við malarflutningabílinn og kerran endaði fyrir utan veg.
Mill viðbúnaður var, tveir tækjabílar og tveir sjúkrabílar en nokkra stund tók að ná fólkinu út úr bílnum. Virtust þau ekki alvarlega slösuð en farið var með þau á sjúkrahús.
Við slysið lokaðist leið af Krýsuvíkurvegi í gegnum iðnaðarsvæðið og út á Reykjanesbraut en hjáleið er um Hraunhellu og Hringhellu á meðan lokið er við gerð mislægra gatnamóta við Krýsuvíkurveg.
