Breyting á deiliskipulagi Hamarsbrautar 5 hefur farið nokkra hringi í stjórnkerfinu og var umsögn skipulagsstjóra samþykkt með 2 atkvæðum í skipulags- og byggingarráði og málinu vísað aftur til bæjarstjórnar. Mikil óánægja hefur verið hjá íbúum sem ítrekuðu mótmæli sín á kynningarfundi um málið fyrir skömmu en verið er að breyta einbýlislóð í lóð undir tvíbýli. Hér má sjá svör við athugasemdum íbúanna.
Skipulagstillöguna má sjá hér.
Bæjarstjórn samþykkti á fundi sínum í gæ með 6 atkvæðum gegn 5 fyrirliggjandi tillögu að breytingu á deilskipulagi Hamarsbrautar 5 og að málinu verði lokið í samræmi við 3. mgr. 41.gr. laga 123/2010.
Bókuðu fulltrúar minnihlutans mótmæli sín við afgreiðslu málsins:
„Bæjarfulltrúar minnihlutans hafa ítrekað bent á að í þessu máli hafi sjónarmið íbúa svæðisins ekki haft neitt vægi við meðferð þess og afgreiðslu. Hefur afgreiðslu málsins í tvígang verið frestað hér í bæjarstjórn, síðast með þeim orðum formanns bæjarráðs að ætlunin væri að reyna að bæta þar úr og ná sátt við íbúa við Hamarsbraut sem hafa ítrekað mótmælt breytingunni, meðal annars með vísan til þess að með henni sé gengið gegn nýlega samþykktu skipulagi svæðisins. Ekkert liggur fyrir í málinu nú sem bendir til þess að breyting hafi orðið á afstöðu íbúa á svæðinu né heldur að gerð hafi verið raunverleg tilraun af hendi bæjaryfirvalda til að mæta sjónarmiðum þeirra og skapa sátt um fyrirhugaða uppbyggingu. Af þeirri ástæðu getum við ekki samþykkt tillöguna og greiðum atkvæði gegn henni.“
Breytingin felst í að: Komið er fyrir tvíbýli á lóðinni. Ekki eru gerðar tillögur að öðrum skilmála breytingum. Heimilt byggingarmagn á lóð verður áfram 204,8 m² (nhl. 0,45) og aðrir þættir en snúa að gerð hússins eins og kveður á um sk. gildandi skilmálum. Bílastæði eru leyst innan lóðar og eru nú staðsett fyrir miðju lóðar við Hamarsbraut 5, í stað þess að vera að aðliggjandi lóðarmörkum líkt og fyrri tillaga gerði ráð fyrir. Lang flest húsin við götuna eru einbýlishús. Á nærliggjandi lóðum við Hamarsbraut 5 eru tvö hús sem eru parhús, þ.e. tvær íbúðir í hvoru húsi um sig.
Skipulagsyfirvöld setja þá kvöð að leysa þurfi bílastæði innan lóðar. Gert er ráð fyrir fjórum bílastæðum inni á lóð við Hamarsbraut 5, eða tvö fyrir hvorn hluta fyrir sig m.v. að parhús rísi á lóðinni. Í gildandi deiliskipulagi er gert ráð fyrir allt að 3 bílastæðum lóð við fimm húsanna við Hamarsbraut. Tveimur stæðum við 4 hús og eitt stæði á lóð við 4 þeirra. Eitt hús við götuna hefur ekki bílastæði á lóð og sk. gildandi skipulagi verða þau tvö.
Umferðarsérfræðingur hefur farið yfir áhrif umferðar við aukningu einnar íbúðar við Hamarsbraut og telur þau minniháttar.
Breytingarnar voru grenndarkynntar frá 29.6.2017 til 10.08.4.2017. Athugasemdir bárust frá þrettán íbúum í næsta nágrenni.
Það er mat skipulagsfulltrúa að með þeim breytingum sem gerðar hafa verið með tillögu dags. 30.05.2017, þá er fyrir liggjandi lausn bílastæða fullnægjandi, byggingarreitur óbreyttur, hæð mannvirkja óbreytt og byggingarmagn óbreytt. Í því ljósi er lagt til að málinu verði lokið í samræmi við 42. gr. skipulagslaga.
