Fjölmenni var á kynningarfundi um tillögu sérfræðinga um fyrirhugaða legu Borgarlínu í gegnum Hafnarfjörð sem gefur til kynna að íbúar eru áhugasamir um verkefnið sem er gott þar sem góðar almenningssamgöngur skipta okkur öll máli. Í svæðisskipulagi höfuðborgarsvæðisins 2014-2040 er gert ráð fyrir vinnu við samgönguás (Borgarlínu) í gegnum höfuðborgarsvæðið sem veitir forgang fyrir almenningssamgöngur til þess að tryggja að Strætó eða hraðvagnakerfi fyrir almenningssamgöngur fái forgang í umferðinni.
Vöndum til verka með Borgarlínu
Nú er það þannig með alla útreikninga til framtíðar hvort sem um er að ræða samgöngur eða önnur verkefni að gefnar eru ákveðnar forsendur sem unnið er út frá. Í grunnforsendum fyrir Borgarlínu er lagt upp með að farþegum í almenningssamgöngum muni fjölga úr 4% í 12% og þétting byggðar muni verða veruleg nálægt legu hennar. Full ástæða er til að endurmeta þessar forsendur!
Þegar fyrstu tillögur verkefnastjórnar SSH um legu borgarlínu voru kynntar haustið 2016 gerði umhverfis- og framkvæmdaráð Hafnarfjarðar athugasemd þess efnis að eðlilegt væri að Reykjanesbraut yrði hluti af Borgarlínu enda teljum við það verulegt hagsmunamál fyrir Hafnfirðinga til lengri tíma litið að tryggja góðar almenningssamgöngur austan megin á höfuðborgarsvæðinu.
Þar sem skipulagsvinna er mjög tímafrek og það svæðisskipulag sem unnið er eftir á að gilda til ársins 2040 er umhugsunarefni að Reykjanesbraut sé ekki inni í myndinni sem hluti af þessum samgönguás, sérstaklega þegar fyrir liggur að íbúakjörnum mun fjölga verulega meðfram Reykjanesbrautinni og má þar nefna byggingu Urriðaholts og uppbyggingu við Vífilsstaði og Smáralind.
Ekki liggur fyrir með hvaða hætti framkvæmdir vegna Borgarlínu verða fjármagnaðar en rætt er um að hver kílómetri gæti kostað um einn milljarð. Ákvæði í stjórnarsáttmála um stuðning við Borgarlínu gefur góð fyrirheit en ekkert hefur verið staðfest varðandi aðkomu ríkisins.
Betri strætó?
Þegar íbúar velja sér samgöngumáta líta þeir til tímalengdar ferða og ef nota á almenningssamgöngur þá skiptir líka máli hve oft þarf að skipta um vagn. Forgangsreinar tryggja áreiðanleika og því mikilvægt að vinna á forsendum svæðisskipulagsins haldi áfram. Þá er ýmislegt í þeim tillögum sem fram hafa komið varðandi Borgarlínu sem mætti taka til skoðunar í núverandi kerfi Strætó eins og farmiðasjálfsalar, upplýsingaskilti sem sýna í rauntíma hvenær næsti vagn kemur og betri biðskýli. Nú stendur yfir endurskoðun á leiðakerfi innanbæjaraksturs í Hafnarfirði auk þess að áfram verður unnið að því að bæta leið 21 og stytta ferðatíma innan bæjarins.
Helga Ingólfsdóttir
bæjarfulltrúi og formaður umhverfis og framkvæmdaráðs.
