Gítarsnillingurinn Björn Thoroddsen heldur garðtónleika hjá sér að Hringbraut 63, laugardaginn 22. júlí kl. 15.
Gammarnir ásamt gestgjafnum Birni Thoroddsen, Þóri Baldurs, Stebba Stef., Bjarna Sveinbjörns, Fúsa Óttars og Jóa Helga koma fram og gleðja gesti.
„Þegar ég var 5 ára í gamla daga átti ég stóra drauma um Hringbrautina,“ segir Björn Thoroddsen. „Einn var að gera tónleikahöll sem svipaði til Laugardalshallar og hún átti að vera staðsett í holtinu milli Hringbrautar og Holtsgötu. Það gekk ekki eftir. En eftir að við Ella, konan mín fluttum aftur á æskuslóðirnar í Hafnarfirði fengum við þá fáranlegu hugmynd að vera með tónleika á svölunum okkar, það gekk ekki alveg því hljómsveitin komst ekki fyrir en á núll einni var ákveðið að vera bara á grasinu fyrir aftan húsið og það gekk fjandi vel. Þetta er þriðja árið sem við erum með tónleika í garðinum okkar á Hringbraut 63 og eru allir velkomnir og kostar ekkert inn,“ segir hinn hægláti og alþýðlegi gítarsnillingur, Björn Thoroddsen.
