Bergrún Íris Sævarsdóttir, bæjarlistamaður Hafnarfjarðar, býður í sumarpartý í garðinum heima hjá sér að Herjólfsgötu 12 á morgun, 17. júní kl. 13-15. Tilefnið er útgáfa bókar Bergrúnar, Kennarinn sem hvarf sporlaust.
Bókin fjallar um krakka í skíðaferðalagi og eru gestir hvattir til að mæta með skíðagleraugu eða annan skíðabúnað samkvæmt þema bókarinnar. „Þá er tilvalið að skella sér í snjógalla enda veðurspáin þó nokkuð kuldaleg, eins og oft áður á þjóðhátíðardaginn”.
Flottasti skíðamaðurinn fær veglega bókagjöf frá Bókabeitunni og gjafabréf á námskeið í myndlýsingum hjá Bergrúnu.Gestir og gangandi geta spreytt sig á gátum mannræningjans, leikið í garðinum og hoppað á trampólíni auk þess að næla sér í áritað eintak af Kennaranum sem hvarf sporlaust. Grillaðir sykurpúðar og heitt kakó verður í boði eins og í öllum góðum skíðaferðalögum.
Allir eru velkomnir og hægt verður að fá bókina afgreidda snertilaust yfir grindverkið ef fólk kýs að halda fjarlægð.
