Laugardaginn 11. maí verður opnuð sýningin „Í tíma og ótíma“, þar sem sjónum er beint að margvíslegum birtingarmyndum tímans í verkum þriggja alþjóðlegra samtímalistakvenna, þeirra Örnu Óttarsdóttur, Leslie Roberts og Amy Brener.
Á sýningunni er tíminn skoðaður í víðu samhengi, allt frá heimspekilegum vangaveltum um hugtak og eðli tímans til þeirrar persónulegu túlkunar á samtímanum sem einkennir verkin en hugleiðingar um tíma fléttast á mismunandi hátt inn í verk og vinnuaðferðir allra þriggja.
„Handverkið sem finna má í verkum listakvennanna ber merki um þrá eftir hægagangi og íhugun sem mótsvar við hraða samtímans. Verk þeirra mætti þannig lesa sem tilraun til að stöðva tímann eða jafnvel til þess að stíga út úr samtímanum og inn í óræðan tíma listaverksins,“ segir sýningarstjórinn Ingunn Fjóla Ingþórsdóttir.
Sýningin verður opnuð kl. 14 og opið er til kl. 17. Aðgangur er ókeypis.
Arna Óttarsdóttir (f. 1986 á Íslandi) býr og starfar í Reykjavík. Hún lauk BFA-námi frá Listaháskóla Íslands árið 2009 og hefur haldið reglulegar sýningar síðan, ein og með öðrum, innanlands og utan. Á nýliðnum árum hefur hún haldið markverðar einkasýningar í Nýlistasafninu, i8 Gallerí og Harbinger. Árið 2021 voru verk hennar til sýnis á sýningunni Iðavöllur: Íslensk list á 21. öldinni í Listasafni Reykjavíkur. Verk hennar hafa til dæmis verið sýnd í Nordatlantens Brygge, Kaupmannahöfn; Turner Contemporary í Margate; Åplus í Berlín; Cecilia Hillström-galleríinu, Stokkhólmi and Asya Geisberg-galleríinu í New York.
Leslie Roberts (f. 1957 í Bandaríkjunum) vinnur verk sem drifin eru af litum, tungumáli og sjálfssettum reglum. Hún hefur haldið sýningar í New York-borg og víða um Bandaríkin, til dæmis í Minus Space, Marlborough-galleríinu, McKenzie Fine Art, 57W57 Arts, Pierogi, Kathryn Markel, Tiger Strikes Asteroid NY, PPOW, og Brooklyn-safninu í New York; Weatherspoon-listasafninu (Greensboro, NC); og Wellin-safninu (Clinton, NY). Árið 2024 fékk hún styrki frá Gottlieb-sjóðnum og Pollock Krasner-sjóðnum. Hún hefur dvalið sem listakona í Yaddo, Ucross, Ragdale, Virginiu-listamiðstöðinni, Skowhegan, og víðar. Hún er með BA-gráðu frá Yale og MFA frá Queens College. Leslie hefur búið í Brooklyn í rúmlega þrjá áratugi og er Professor Emerita við Pratt-stofnunina.
Amy Brener (f. 1982 í Kanada) býr og starfar í New York. Hún útskrifaðist með MFA-gráðu frá Hunter College árið 2010 og nam við Skowhegan School of Painting and Sculpture 2011. Verk hennar hafa verið sýnd í galleríum og stofnunum í Bandaríkjunum, Kanada, Evrópu og Kína. Þar ber hæst sýningar í MoMA PS1 í New York, Aldrich-nýlistasafninu í Connecticut, Nasher-skúlptúrmiðstöðinni í Dallas, Speed-listasafninu í Kentucky, Galerie Pact í París, Wentrup-galleríinu í Berlín, MacLaren-listamiðstöðinni í Ontario og Riverside-listasafninu í Beijing. Um verk hennar hefur einnig verið fjallað í prentmiðlum á borð við The New York Times, Art in America, Vogue, CURA, Hyperallergic, Artnet News og The Brooklyn Rail. Hún er aðstoðarprófessor við Hamilton College í Clinton, NY.
