Guitarama, gítarhátíð Bjössa Thor verður nú haldin í 20. sinn en sú hátíð hefur farið fram hérlendis, í Canada, Bandaríkjum og Noregi. Ekkert verður til sparað þegar Björn snýr aftur í heimabæinn þar sem hann „sleit fyrstu strengina“. Menningarhúsið Bæjarbíó verður fyrir valinu þar sem glæsilegur hópur tónlistarmanna kemur fram á Guitarama, 30. október kl. 20.
Björn hefur valið hópinn af mikilli natni á þessum tímamótum og má búast við skemmtun á heimsmælikvarða sem enginn alvöru tónlistarunnandi má láta framhjá sér fara.
Þeir sem fram koma eru:
- Óskar Logi, Vintage Caravan
- Unnur Birna, Jethro Tull, Fjallabræður o.fl.
- Þórður Árnason, Þursaflokkurinn, Stuðmenn o.fl.
- Jóhann Helgason, Change, Þú og ég, Magnús & Jóhann o.fl.
- Reynir Hauksson, Flamenco gítarleikari á heimsmælikvarða
- Birgir Hrafnsson, Ævintýri, Change, Svanfríður, Pops o.fl.
- Ásamt hinni alþjóðlegu og heimsfrægu sveit Guitar Islancio.
Þeim til fulltingis verður rythmaparið Skúli Gíslason trymbill og Sigurgeir Skafti bassaleikari, auk þess sem leynigestur, erlend stjarna, kemur fram. Þá verður Þórður Árnason vígður inn í Guitar Islancio sem nýjasti meðlimurinn.
Björn segir tónleikana vera í nokkuð nýjum stíl, farið verður af stað með akustisk lög og flamingótónlist en svo farið í rock and roll og endað með lögum m.a. frá Change og Svanfríði.
Í fyrsta sinn sem Björn kom fram á sviði var í Flensborg, í pásu hjá Svanfríði sem spilaði undir dansi 1972. Því er vel við hæfi að leika lög með Svanfríði á tónleikunum.
Til gamans má geta að sá yngsti sem kemur fram er Óskar Logi Ágústsson, 27 ára barnabarn Böðvars bóksala í Hafnarfirði.
Miðasala er á Tix.is og við innganginn ef ekki verður uppselt.
