Velkomin vertu Sunna er yfirskriftin á vortónleikum Gaflarakórsins í Víðistaðakirkju kl. 20 miðvikudaginn 4. maí
Gaflarakórinn kór eldri borgara hefur verið starfandi síðan 1994 og er síungur kór á aldrinum 65-92 ára.
Nú er blásið til vortónleika og koma góðir gestir í heimsókn. Það eru Vorboðar úr Mosfellsbæ sem er kór eldri borgara þar í bæ og Álftaneskórinn af Álftanesi. Munu kórarnir bæði syngja einir sér og síðan allir þrír kórarnir saman.
„Lítið var um kórastarf á tíma kóvid en sönggleðin var mikil þegar hægt var að koma saman og æfa á nýjan leik,“ segir Kristjana Þórdís Ásgeirsdóttir stjórnandi Gaflarakósins. „Kórinn æfir tvisvar í viku á mánudögum og miðvikudögum og eru nýir félagar ávallt velkomnir og því tækifæri að koma á tónleikana og hlýða á falleg lög og kynnast því starfi sem þar fer fram,“ segir Kristjana sem hefur stjórnað kórnum í 17 ár.
Vorboðum stjórnar Hrönn Helgadóttir og Ástvaldur Traustason stýrir Álftaneskórnum. Undirleikari til margra ára er Arngerður María Árnadóttir.
Frítt er inn á tónleikana.
