Hvað gengur fulltrúum sem mynda meirihluta í stjórnum og ráðum bæjarins að halda upplýsingum frá öðrum þeim sem sitja í sömu ráðum? Hvers konar stjórnsýsla er það þegar verið er að fela það sem á að gera?
Það vakti undrun margra og jafnvel einhverra sem mynda meirihluta í bæjarstjórn sá feluleikur sem var í gangi við undirbúning á breytingu á fyrirkomulagi ungmennahúsa í bænum. Þá er aðeins verið að tala um stjórnsýsluaðferðina en ekki framkvæmdina sjálfa. Þá er heldur ekki verið að tala um það hvers vegna ákveðið var að loka ungmennahúsinu Hamrinum og segja öllu starfsfólki upp, ákvörðun sem fáir skilja nema helst þeir sem hafa játað pólitíska trú á sinn flokk. Engin rök fylgdu þeirri ákvörðun og ef átti að hafa tvö ungmennahús í stað eins, af hverju gat Hamarinn ekki verið annað þeirra? Var óánægja með starfsfólkið?
Í sjálfu sér kemur þetta ekki á óvart því það virðist svo sem þeir sem valdið hafa hjá Hafnarfjarðarbæ vilji halda sem flestum upplýsingum hjá sér ef þær geti kallað á einhver viðbrögð bæjarbúa, viðbrögð sem ekki henti.
Þrátt fyrir tillögur um frestun máls, svo hægt væri að skoða málið áður en afstaða væri tekin, var málið afgreitt og afstaða til frestunar réðst algjörlega af flokkslínum. Ætlar einhver að halda því fram að trú á sinn flokk sé svo sterk að fólk geti ekki haft mismunandi skoðanir?
Og mitt í hávaða út af þessu máli, fyrirhugaðri niðurdælingu á koltvísýringi, orkuvinnslu í Krýsuvík þá demba menn inn tillögu um að byggja íbúðarhús á Óla Runs túni, einu af fáu grænu svæðum sem eru eftir í bænum.
Alvöru samráð við íbúa er forsenda fyrir farsælu samfélagi og það er eitthvað sem allir bæjarfulltrúar Hafnarfjarðar mega hafa í huga.
Guðni Gíslason ritstjóri.
