Hvað börn og ungmenni gera í frístundum sínum er mikilvægt fyrir líkamlegan og andlegan þroska.
Að hitta nýja félaga, aðlagast hópi og vera með í að móta hann er ekki síður mikilvægt en sú æfing eða þjálfun sem fæst. Þetta er mótunartímabil þar sem einstaklingurinn lærir að bera ábyrgð, starfa í mismunandi hópum og að taka tillit til annarra.
Mikið framboð er af hvers konar tómstundastarfi fyrir börn og mikilvægt að foreldrar skoði framboðið vel. Fjölbreytt tómstundastarf á unga aldri gefur börnum kost á að kynnast sem flestu og getur verið með í að barnið síðan velji sér áhugamál sem henti því best.
Þrátt fyrir miklar niðurgreiðslur er ekki ódýrt fyrir foreldra að gefa börnum sínum kost á að taka þátt í tómstundastarfi. Sumar greinar eru dýrari en aðrar og niðurgreiðsla hefst ekki fyrr en börn hefja grunnskóla. Það getur því verið þrautinni þyngri fyrir stórar barnafjölskyldur að fjármagna tómstundastarf barna sinna.
Gríðarlegar upphæðir fara í byggingu íþróttamannvirkja og á verkefnalista Hafnarfjarðarbæjar eru dýrar framkvæmdir. Stundum má spyrja sig hvort þar sé meira verið að huga að fullorðnu fólki en börnum og ungmennum. Framkvæmdafé Hafnarfjarðarbæjar er ekki ótakmarkað og í raun mjög takmarkað og því mikilvægt að rétt sé forgangsraða.
Guðni Gíslason ritstjóri.
